መደበኛ ያልሆነ

መስከረም 6፤2013-ከሠሞኑ በመተከል ዞን አንዳንድ አካባቢዎች የተፈጠረውን የጸጥታ ችግር የማረጋጋትና የሕግ የበላይነትን የማስከበር ሥራ የመከላከያ ሠራዊት፣ የፌዴራል ፖሊስ እና የክልሉ የጸጥታ ኃይል በጋራ እየሠሩ መሆኑን የክልሉ ሠላም ግንባታ እና ጸጥታ ቢሮ ገለጸ፡፡

በዞኑ ቡለንና ወምበራ ወረዳ አንዳንድ ቀበሌዎች ሠሞኑን በጸረ-ሠላም ኃይሎች የተፈጠረው የጸጥታ ችግር ወደ አንጻራዊ ሠላም በመመለስ ላይ መሆኑንም ቢሮው አስታውቋል፡፡

የክልሉ ሠላም ግንባታ እና ጸጥታ ቢሮ ኃላፊ አቶ አበራ ባያታ እንደገለጹት፣ ጸረ-ሠላም ኃይሎች በመተከል ዞን ወምበራ ወረዳ መልካን ቀበሌ እና በቡለን ወረዳ ኤጳር ቀበሌ በፈጸሙት ጥቃት የንጹኃን ዜጎች ሕይወት አልፏል፡፡

ጥቃት አድራሾቹ ቀደም ሲል በወምበራ ወረዳ ኮንግ ማዕከል “የብልጽግና ፓርቲ እና የመንግስት ደጋፊ ናችሁ” በሚል በህብረተሰቡ ላይ የግድያ፣ የማገት እና የማፈናቀል ድርጊቶችን መፈጸማቸውን አስታውሰዋል፡፡

በሐምሌ ወር ደግሞ በጉባ ወረዳ ያቡሉ ቀበሌ በንጹኃን ዜጎች ላይ መሠል ጥቃት አድርሰዋል ያሉት ኃላፊው፣ በመከላከያ ሠራዊት፣ በፌዴራል ፖሊስና በክልሉ የጸጥታ ኃይል በተወሰደባቸው እርምጃ አብዛኞቹ የተደመሰሱ ሲሆን፣ 168 አባላቶቻቸውና ግብረ-አበሮቻቸው በቁጥጥር ስር ውለው ጉዳያቸው በህግ እየታየ መሆኑን ጠቁመዋል፡፡

እነዚህ ጸረ-ሠላም ኃይሎች ከሳምንት በፊት ደግሞ በወምበራ ወረዳ መልካን ቀበሌ ገብተው 36 የሚሆኑ የሀገር ሽማግሌዎችን፣ የቀበሌ አመራሮችንና ሚሊሻዎችን፣ እንዲሁም ታዋቂ ሰዎችን አግተው ድብደባ ፈፅመዋል። አስከ 10 ሺህ ብር የሚደርስ ገንዘብ እና ከብቶችን እንዲሰጧቸው ሲያስገድዱ እንደነበርም ተገልጿል፡፡

በተመሳሳይ ጳጉሜ 1/2012 ዓ.ም ከሌሊቱ 8፡00 ሠዓት ገደማ በቡለን ወረዳ አጳር ቀበሌ ገብተው ባደረሡት ጥቃት የንጹኃን ዜጎች ሕይወት ማለፉን ኃላፊው ገልጸዋል፡፡

ኤጳር ቀበሌ ማዕከልን ጨምሮ በዞኑ የጸጥታ ችግር በተፈጠረባቸው አካባቢዎች የመከላከያ ሠራዊት፣ የፌዴራል ፖሊስና የክልሉ የጸጥታ ኃይል ችግሩ በተፈጠረ ማግስት ወደ ቦታው መድረሳቸውን የገለጹት አቶ አበራ፣ ጸጥታውን የማረጋጋትና የሕግ የበላይነት የማስከበር ሥራ እየሠሩ መሆኑን አስታውቀዋል፡፡

በስጋት ምክንያት ከአካባቢያቸው የተፈናቀሉ ዜጎች ወደ ማዕከሉ እየተመለሱ ስለመሆናቸውም ነው ጨምረው የገለጹት፡፡

እየተሠሩ ካሉት የማረጋጋት ሥራዎች ጎን ለጎን በስጋት ምክንያት ከቤታቸው ለተፈናቀሉ ዜጎች አስፈላጊ የሰብዓዊ ድጋፍ በመደረግ ላይ መሆኑንም አንስተዋል፡፡

የተፈጸመውን ጥቃት በ2 ብሔሮች ላይ ብቻ ያነጣጠረ ተደርጎ በማህበራዊ ሚዲያ እየተገለጸ ያለው መረጃ ፍጹም ከእውነት የራቀ መሆኑንም ተናግረዋል።

ጸረ-ሠላም ኃይሎቹ ጥቃት ያደረሱት “ከእኛ ሀሳብ በተቃራኒ ቆማችኋል” ያሏቸውን የአካባቢው ነዋሪዎች እንጂ ብሔርን መሠረት ያደረገ አለመሆኑን አመልክተዋል፡፡

በተጨማሪም በማህበራዊ ሚዲያ በጥቃቱ የሞቱ ሰዎችን ቁጥር በተመለከተ እየተገለጸ ያለው አሃዝ መሠረተ-ቢስ ነው ያሉት አቶ አበራ፣ የሟቾችን ቁጥርም ሆነ የደረሰውን የጉዳት መጠን በተመለከተ መረጃ በመጣራት ላይ ሲሆን በቅርቡ ለህብረተሰቡ ይገለጻል ብለዋል፡፡

“አንዳንዴ ሞተዋል፤ ሌላ ጊዜ ደግሞ ጠፍተዋል” ሲባሉ የነበሩ 27 ሰዎች ተገኝተው ወደ ቤተሰቦቻቸው መቀላቀላቸውንም ኃላፊው አንስተዋል፡፡

በክልሉ በተለይም ለውጡን ተከትሎ ከመጣው የፖለቲካ ስነ-ምህዳር መስፋት ጋር ተያይዞ ጥምረት ፈጥረው የሚንቀሳቀሱት ቦዴፓ፣ ቤህኔን ሰዴድ እና ጉህዴን የፖሊቲካ ድርጅቶች ህግን አክብረው ከመንቀሳቀስ ይልቅ፣ እየተጓዙበት ያለው ህገ-ወጥ አካሄድ ህብረተሰቡን ውዥንብር ውስጥ እንዲገባ ማድረጉን ጠቁመዋል።

በተለይም ጉህዴን ወጣቶችን “የደርጅቱ ወታደሮች ትሆናላችሁ” በሚል ግልጽ ቅስቀሳ ሲያደርግና መልምሎ ሲያሰለጥን እንደነበር ነው የገለጹት፡፡

ሠላም ወዳዱ ሕዝብ እነዚህ ጸረ-ሠላም ኃይሎች የያዙት እኩይ ዓላማ እንዲመክን ከማድረግ ባሻገር፣ የክልሉ መንግስት ከሀገር መከላከያ ሠራዊትና ከፌዴራል ፖሊስ ጋር እየሠራ ላለው ህግ የማስከበር ሥራ የተለመደ ቀና ትብብሩን አጠናክሮ እንዲቀጥልም አቶ አበራ ጥሪ ፡ማቅረባቸውን ከቤኒሻንጉል ጉሙዝ ክልክ ኮሙኒኬሽን ጉዳዮች ጽ/ቤት የተገኘው መረጃ ያሳያል።

Leave a Reply

Your email address will not be published. Required fields are marked *