መደበኛ ያልሆነ

ሰኔ 3፤2013-54 የምርጫ ክልሎች ድምጽ መስጫ ወረቀቶች ድጋሚ ህትመት እንደሚያስፈልጋቸው ምርጫ ቦርድ አስታወቀ!

የኢትዮጵያ ብሔራዊ ምርጫ ቦርድ ከፓለቲካ ፓርቲዎች ጋር በትላንትናው እለት የምክክር መድረክ አከናውኗል።

የቦርዱ ዋና ሰብሳቢ ብርቱካን ሚደቅሳ የድምጽ መስጫ ወረቀት ህትመትን አስመልክቶ ለፓርቲዎች ባቀረቡት ሪፓርታቸው የእጩዎችን ቁጥር መሰረት አድርጎ በተደረገው የገንዘብ ድጋፍ ወቅት፣ ፓርቲዎች የእጩዎች ቁጥር ላይ ባቀረቡት አቤቱታ ፣ በማስከተልም በድምጽ መስጫ ወረቀት እና በውጤት ማሳወቂያ ፎርሞች መካከል የማስታረቅ ስራ ሲሰራ የተወሰኑ የምርጫ ክልሎች የድምጽ መስጫ ወረቀቶች ላይ የተለያዩ ጉድለቶች መገኘታቸውን አሳውቀዋል።

በዚህም መሰረት የቦርዱ ኦፕሬሽን ክፍል ባከናወነው ኦዲት 54 የምርጫ ክልሎች ድምጽ መስጫ ወረቀቶች ድጋሚ ህትመት የሚያስፈልጋቸው ሆነው ተገኝተዋል።

በክልል ሲታይም
• አፋር – 6 ምርጫ ክልል (1ዱ የተወካዮች ምክር ቤት)
• አማራ- 11 ምርጫ ክልል (3ቱ የተወካዮች ምክር ቤት)
• ቤኒሻንጉል ጉሙዝ – 2 ምርጫ ክልሎች ( የክልል ምክር ቤት)
• ጋምቤላ – 3 ምርጫ ክልሎች (የክልል ምክር ቤት)
• ኦሮሚያ – 2 ምርጫ ክልል (የክልል ምክር ቤት)
• ደ/ብ/ብ/ህ- 15 ምርጫ ክልሎች (1ዱ ለተወካዮች ምክር ቤት)
• ሶማሌ- 14 ( የክልል ምክር ቤት)
• ድሬዳዋ – 1 (የከተማ ምክር ቤት) ድጋሚ ህትመት የሚያስፈልጋቸው ምርጫ ክልሎች ያሏቸው ናቸው።

የቦርዱ ሰብሳቢ ለተፈጠረው ችግር በቦርዱ የተወሰዱ አስተዳደራዊ እርምጃዎችን አቅርበው በነዚህ ምርጫ ክልሎች የድምጽ መስጫ ወረቀቶችን አትሞ ለማድረስ የሚኖረውን ችግር በማንሳት እና በአጠቃላይ የሚያመጣውን የእሸጋና የስርጭት ተጽእኖ አብራርተዋል፡፡

ፓርቲዎቹም በስራ ላይ እንዲህ አይነት ችግሮች እንደሚያጋጥሙ ገልጸው ፤ የድጋሚ ህትመቱ በአገር ውስጥ የሚከነወንበት እድል ቢታይ፣ አንዳንድ የምርጫ ክልሎች ደሞ ለጸጥታ የተነሳ ችግር ያጋጠመባቸው ቦታዎች ድምጽ በሚሰጡበት ወቅት አብረው የሚሰጡበት እድል መኖሩን እንደሌላ አማራጭ ማቅረባቸውን ብስራት ራዲዮ ከቦርዱ ያገኘው መረጃ ያሣያል።

ቦርዱ ይህንን ችግር ለመፍታት ሁለት አማራጮች እንዳሉና አንደኛው አማራጭ የድምፅ መስጫ ወረቀቱን አገር ውስጥ ህትመት ማከናወን ሲሆን ሁለተኛው ደግሞ ከላይ የተጠቀሱትን ምርጫ ክልሎች በጸጥታ ችግር የተነሳ ሰኔ 14 ቀን ድምጽ ከማይሰጥባቸው የምርጫ ክልሎች ጋር በጋራ ማከናውን መሆኑን ጠቅሷል፡፡

በሌሎች ምርጫ ክልሎች ድምጽ አሰጣጥ ሂደቱ በተወሰነለት ቀን ሰኔ 14 ቀን የሚከናወን መሆኑን ተጨማሪ መረጃዎቸን ለፓርቲዎች እና ለመራጮች እንደሚሰጥ አሳውቋል።

Leave a Reply

Your email address will not be published. Required fields are marked *