መደበኛ ያልሆነ

ህዳር 21፤2016 -ከእስር የተፈቱት ፍልስጤማውያን በእስራኤል እስር ቤቶች ውስጥ ከፍተኛ በደል ይደርስባቸው እንደነበር ተናገሩ

ከእስራኤል እስር ቤት የተለቀቁ የፍልስጤም እስረኞች በጥቅምት 7 ሃማስ በእስራኤል ላይ ካደረሰው ጥቃት በኋላ ባሉት ሳምንታት ውስጥ በማረሚያ ቤት ጠባቂዎች እንግልት እና የጋራ ቅጣት ፈፅመውብናል ሲሉ ተናግረዋል። በዱላ መመታህ፣ ከውሾች ጋር እንድንቀመጥ መደረግን ጨምሮ ልብሳችን ፣ ምግብ እና ብርድ ልብስ እንደተወሰደባቸው ተናግረዋል። አንዲት ሴት እስረኛ አስገድዶ መድፈር መኩራ እንደተፈፀመባት ተናግራለች።

በእስር ቤት ውስጥ ባሉ እስረኞች ላይ ሁለት ጊዜ አስለቃሽ ጭስ እንደተተኮሰም። በቅርቡ ከእስር የተለቀቁ ስድስት ሰዎችን ቢቢሲ ያነጋገረ ሲሆን ሁሉም እስር ቤት ከመውጣታቸው በፊት ድብደባ እንደተፈጸመባቸው ተናግረዋል። የፍልስጤም እስረኞች ማህበር አንዳንድ ጠባቂዎች እጃቸው በካቴና በታሰሩ እስረኞች ላይ ሽንታቸውን ይሸኑ እንደነበር ገልጿል። ባለፉት ሰባት ሳምንታት ውስጥ ስድስት ሌሎች እስረኞች በእስራኤል ማረሚያ ቤት ውስጥ ህይወታቸው አልፏል።

እስራኤል ሁሉም እስረኞች በህጉ መሰረት እንደታሰሩ ተናግራለች። የ18 አመቱ መሀመድ ናዝል በጋዛ በሃማስ ተይዘው በነበሩ በእስራኤላውያን ታጋቾች ምትክ በዚህ ሳምንት ከእስር ከተፈቱት መካከል አንዱ ነው። ከነሐሴ ወር ጀምሮ ያለምንም ክስ በማረሚያ ቤት ታስሮ እንደነበር እና ለምን እንደታሰረ እንደማያውቀው ተናግሯል።መሃመድ ከእስር ከተለቀቀ በኃላ በራማላህ በተደረገለት የኤክስ ሬይ ምርመራ በእስር ላይ እያለ በደረሰበት ድብደባ ጣቶቹ መሰበራቸውን ማረጋገጥ ተችሏል።

የፍልስጤም እስረኞች ማህበር ከጥቅምት 7 ጥቃት በኋላ በእስር ላይ የሚገኙት የፍልስጤማውያን ሞት ቁጥር በከፍተኛ ሁኔታ እየጨመረ መምጣቱን እና ከዚያን ቀን ጀምሮ ስድስት ሰዎች በእስር ቤት መሞታቸውን ተናግሯል። በዚህ ጉዳይ ላይ እስራኤል በቀጥታ ምላሽ ከመስጠት ተቆጥባለች። ነገር ግን ባለፉት ሳምንታት አራት እስረኞች በአራት የተለያዩ ቀናት መሞታቸውን እና የእስር ቤቱ አገልግሎት ስለ ሞት መንስኤ ምንም አያውቅም ብላለች ።

በስምኦን ደረጄ

መደበኛ ያልሆነ

ህዳር 20፤2016 -በእየሩሳሌም በዛሬው እለት የደረሰው ጥቃት ከጋዛ ውጭ እየጨመረ ያለውን ውጥረት ሊያሳይ ይችላል ተባለ

በእየሩሳሌም ከተማ በዛሬው እለት የተፈጸመውን ጥቃት ተከትሎ የሶስት ሰዎች ህይወት ሲያልፍ በርካቶች ቆስለዋል።

ምናልባትም በእስራኤል እና በሃማስ መካከል እየተካሄደ ያለው ጦርነት በእስራኤል እና በፍልስጤም ግዛቶች ውስጥ ውጥረት ሊያነግስ እንደሚችል የሚያሳይ ነው ተብሏል። ሁለቱ ጥቃት አድራሾች ወንድማማቾች ሲሆኑ የእስራኤል የደህንነት አገልግሎት በምስራቃዊ እየሩሳሌም የሚገኙ የሀማስ ደጋፊዎች መሆናቸውን በመግለፅ በሽብር ተግባራቸው ቅጣት ይጠብቃቸዋል ተብሏል።

ከክስተቱ በኋላ ብዙም ሳይቆይ የእስራኤል ፖሊስ በአጥቂዎቹ መኪና ውስጥ ከፍተኛ መጠን ያላቸውን ጥይቶች እና አውቶማቲክ ጠመንጃ የሚያሳዩ ምስሎችን አጋርቷል፣ ይህም ምናልባት በከተማው ውስጥ ሌላ ቦታ ላይ ሰፊ ጥቃት ለመሰንዘር አቅደው እንደነበር ይጠቁማሉ። ከሁለት ሳምንት በፊት በፍልስጤም ቤተልሄም እና እየሩሳሌም ከተሞች መካከል በሚገኝ የፍተሻ ጣቢያ ላይ በተፈጸመ የተኩስ ጥቃት አምስት እስራኤላውያን ሲቆስሉ አንድ የደህንነት መስሪያ ቤት አባል መገደሉ ይታወሳል።

ይህ የጥቃት ዜና የተሰማው በትላንትናው እለት የእስራኤል ጦር በጄኒን ከተማ ዘልቆ በገባበት ወቅት ሁለት ፍልስጤማውያን ወንድ ልጆች እድሜያቸው ስምንት እና 14 ዓመት የሆናቸው ታዳጊዎች በጥይት ከተገደሉ ከአንድ ቀን በኋላ ነው። ከጥቅምት 7 ወዲህ ከእስራኤል የጸጥታ ሃይሎች ጋር በተፈጠረ ግጭት በርካታ ፍልስጤማውያን ተገድለዋል።

በሌላ በኩል የዩናይትድ ስቴትስ የውጭ ጉዳይ ሚኒስትር አንቶኒ ብሊንከን ለእስራኤል ፕሬዝዳንት አይዛክ ሄርዞግ ጋግ በዛሬው እለህ በቴል አቪቭ መክረዋል። ብሊንከን የእስራኤል-ሀማስ ጦርነት በጥቅምት 7 ከጀመረ ወዲህ ለሶስተኛ ጊዜ አካባቢውን እየጎበኛ ይገኛል።ባለፈው ሳምንት ታጋቾች ወደ ቤታቸው ሲመለሱ ከቤተሰቦቻቸው ጋር ሲገናኙ የነበረውን አወንታዊ እድገት አይተናል ሲሉ ብሊንከን በስብሰባው ወቅት ተናግረዋል።

እንዲሁም የተኩስ አቁሙ በጋዛ ውስጥ ንጹሃን ዜጎች ወደሚፈልጉበህ እንዲሄዱ እና የሰብአዊ እርዳታ መጨመር አስችሏል ብለዋል። ይህ ሂደት ውጤቱን እያመጣ ነው፤ አስፈላጊ ነው እና ምሊቀጥል እንደሚችል ተስፋ እናደርጋለን ሲሉ ብሊንከን ተናግረዋል። ከእስራኤሉ ጠ/ሚ ቤንጃሚን ኔታንያሁ ጋር የተነጋገሩ ሲሆን ከፍልስጤሙ ፕሬዝዳንት ማህሙድ አባስን ጋግ በራማላ ይመክራሉ።

በበረከት ሞገስ

መደበኛ ያልሆነ

ህዳር 20፤2016 -በከንባታ ጠንባሮ ዞን መምህራን የጥቅምት ወር ደሞዝ አልተከፈላቸውም ተባለ

???? ደሞዝ ባለመከፈሉ የተነሳ መምህራን ስራ አቁመዋል

በከንባታ ጠንባሮ ዞን ጠንባሮ ወረዳ ውስጥ ያሉ መምህራን የጥቅምት ወር ደሞዝ እንዳልተከፈላቸው የዞኑ አስተዳደር ገልጿል።

ዞን ከዚህ ቀደም በነበሩት ዕዳዎች የተነሳ ለደሞዝ የሚመጣው በጀት ተቆራርጦ እንደሚደርስ  የዞኑ አስተዳደር አቶ አበራ ኮርፊክሶ ለብስራት ሬድዮና ቴሌቭዥን በመናገር ችግሩ ውስብስብ መሆኑን አንስተዋል።

በተጨማሪም በጠንባሮ ወረዳ ያሉ ሙሉ የመንግስት ሰራተኞች ደሞዝ ከመስከረም ጀምሮ እንዳልተከፈላቸውም ተናግረዋል።ባለፈው 2015 በጀት ዓመት ጀምሮ የሰራተኞች የደሞዝ ወራት እያለፉ እንደተከፈላቸው እና ለደሞዝ ከተበጀው  ገንዘብ ውጪ በሌላ መንገድ የሚገኙ ገንዘቦችን ለደሞዝ በማከፋፈል እንደተከፈለም ገልፀዋል።

የበጀት እጥረቱ የተከሰተው ከ2012 ዓ.ም ጀምሮ በጥሬ ገንዘብ ብድር ደሞዝ ለሰራተኞች እንደተከፈለ እና በብድር የተከፈለውም ደሞዝ እስካሁን ድረስ የበጀት ጉድለት እንዲከሰት ማድረጉን ገልፀዋል። በዚህ ምክንያትን የሙድላ ሁለተኛ ደረጃ ትምህርት ቤት መምህራን ስራ ማቆማቸውን ገልፀዋል።

የበጀት እጥረቱ አሁን ላይ ሊከሰት የቻለው ቀድሞ በነበረው ዕዳ ምክንያት ለማዳበሪያ እና ለጥሬ እህል እንዲሁም ለሌሎች ጉዳዮች ስለሚቆረጥ መሆኑን ጨምረው ለጣቢያችን ተናግረዋል።

በምህረት ታደሰ

መደበኛ ያልሆነ

ህዳር 20፤2016 -ተሳፋሪ መስለው በመግባት አሽከርካሪውን የገደሉት ግለሰቦች በእስራት ተቀጡ

ዮሃንስ ሰለሞን እና እዮብ በሃይሉ የተባሉት ተከሳሾች ወንጀሉን የፈፀሙት በአቃቂ ቃሊቲ ክፍለ ከተማ ወረዳ 5 ልዩ ቦታው ሳሪስ አቦ ተብሎ በሚጠራው አካባቢ ነው፡፡

ተከሳሾቹ ዛይራይድ ወደተባለ የትራንስፖርት አገልግሎት ሰጪ ድርጅት ስልክ በመደወል ተሽከርካሪ እንዲመጣላቸው ካደረጉ በኋላ ከሳሪስ አቦ ወደ ጎተራ ከኋላ ወንበር ተቀምጠው ጉዞ ይጀምራሉ፡፡  ነገር ግን ጎተራ ከደረሱ በኋላ ምክንያት ፈጥረው በድጋሚ ወደመጡበት እንዲመልሳቸው ለአሽከርካሪው ይነግሩትና  ወደ ሳሪስ አቦ ይመለሳሉ፡፡

ወንጀል ለመፈፀም የሚያስችላቸውን ጨለማ እና ሰዋራ ስፍራ ሲያገኙ እዮብ የአሽከርካሪውን አንገት በገመድ ሲያንቀው ዮሃንስ ደግሞ በድብቅ ይዞት በነበረው መዶሻ  አናቱን በመምታት ህይወቱ እንዲያልፍ አድርገዋል፡፡

የአሽከርካሪውን መሞት ካረጋገጡ በኋላ ተሽከርካሪውን ጨምሮ  2ሞባይል ስልኮችንና ጥሬ ገንዘብ የወሰዱት ተከሳሾቹ፣ መኪናውን ለመሸጥ ሞክረው አልሳካ ሲላቸው ወርቁ ሰፈር ተብሎ በሚጠራው አካባቢ መንገድ ዳር አቁመው ተሰውረዋል፡፡

የአዲስ አበባ ፖሊስ  ወንጀሉ እንደተፈፀመ ሪፖርት ከደረሰው በኋላ  የምርመራና የክትትል ቡድን በማቋቋም ባደረገው ከፍተኛ ጥረት ተከሳሾቹ ከሶስት ወራት ፍለጋ በኋላ በቁጥጥር ስር ሊውሉ ችለዋል፡፡

ጉዳዩን ሲመለከት የቆየው የፌደራል ከፍተኛ ፍርድቤት ልደታ ምድብ 1ኛ ወንጀል ችሎት ሰሞኑን በዋለው ችሎት ተከሳሾቹ በፈፀሙት ከባድ የውንብድና ወንጀል  ጥፋተኝነታቸውን  በሰው እና በሰነድ ማስረጃ ካረጋገጠ በኋላ  ዮሃንስ ሰለሞን  በ15 ዓመት እንዲሁም  እዮብ በሃይሉ በ12 ዓመት ፅኑ እስራ እንዲቀጡ ወስኗል፡፡

መደበኛ ያልሆነ

ህዳር 20፤2016 -የኖቤል ሽልማት አሸናፊ እና በጦር ወንጀለኝነት የተፈረጁት የቀድሞ የአሜሪካ የውጭ ጉዳይ ሚኒስትር ሄንሪ ኪሲንገር በ100 አመታቸው ከዚህ አለም በሞት ተለዩ

ሄንሪ ኪሲንገር  በ100 ዓመታቸው በኮነቲከት በሚገኘድ መኖሪያ ቤታቸው ከዚህ ዓለም በሞት ተለይተዋል።በውጪ ግንኙነት ፖሊሲ ውስጥ ቁርጠኛ ባለሙያ የሚባሉ ሲሆን፣  የኖቤል የሰላም ሽልማት በአንድ ወገን ሲሸለሙ በሌላ በኩል ደግሞ የጦር ወንጀለኛ ተብለው ሙሉ በሙሉ ተወግዘዋል።

የዩናይትድ ስቴትስ ብሄራዊ ደህንነት አማካሪ እና የውጭ ጉዳይ ሚኒስትር በመሆን ከሶቪየት ኅብረት እና ከቻይና ጋር ያለውን ግንኙነት በብርቱ የተከታተሉ እን የመሩ ሰው ናቸው። እኤአ በ1973 የአረብ-እስራኤል ግጭት እንዲቆም በዲፕሎማሲ ረገድ ሰርተዋል። የፓሪስ የሰላም ስምምነት ድርድር አሜሪካን በቬትናም ከነበረችበት ረጅም ቅዠት እንድትወጣ እስችለዋል።

ደጋፊዎቻቸው በአመራር ብቃታቸው እውነተኛ ፖለቲከኛ ሲሉ የሚያወድሷቸው ሲሆን ተቺዎቻቸው ደግሞ ግብረ ገብ የጎደላቸው ሲሉ ያወግዟቸዋል። በቺሊ ውስጥ የግራ መንግስትን የገለበጠውን ደም አፋሳሽ መፈንቅለ መንግስት በመደገፍ እና የአርጀንቲና ጦር በህዝቡ ላይ ያካሄደውን ‘ቆሻሻ ጦርነት’ የሚባለውም ውጊያ ዓይናቸው እያየ ቢያንስ በዝምታ በመደገፍ ተከሰዋል።

ኮሚዲያኑ ቶም ሌሬር ለቀድሞ ሚኒስትሩ ኪሲንገር የኖቤል ሽልማት መሰጠቱን ሲሰማ የፖለቲካ ሳታየር ወይም ፌዝ ጊዜ ያለፈበት ነው ማለቱ ይታወሳል።ሄንዝ አልፍሬድ ኪሲንገር በ1923 ባቫሪያ ውስጥ መካከለኛ ገቢ ካላቸው የአይሁድ ቤተሰብ ተወልደዋል። ቤተሰቡ የናዚን ስደት ለመሸሽ በ1938 ወደ ኒውዮርክ ወደ ሚገኘው የጀርመን-የአይሁድ ማህበረሰብ ተቀላቅለዋል።

ሄንሪ በተፈጥሮ ዓይን አፋር ታዳጊ የነበሩ ሲሆን ከፍተኛ የእግር ኳስ ፍቅር ነበራቸው። የሁለተኛ ደረጃ ትምህርታቸውን በማታ የጨረሱ ሲሆን ቀን ቀን ብሩሽ ፋብሪካ ውስጥ ይሰሩ ነበር። አካውንቲንግ ለማጥናት አቅደው የነበረ ቢሆንም ሠራዊቱን ግን ተቀላቅለዋል። በእግረኛ ጦር ተመድበው የአእምሮ ብስለት እና የቋንቋ ችሎታቸው በወታደራዊ መረጃ ጥቅም ላይ ውሏል።  የ23 አመት ወጣት ተጠርጣሪዎችን የማሰር ፍፁም ስልጣን ያለው የቀድሞ የጌስታፖ መኮንኖችን የሚያድን ቡድን በቡልጌ ውጊያ ተሰጥቶት ነበር።

በእስካሁን አለማየሁ

መደበኛ ያልሆነ

ህዳር 20፤2016 – የሰባ ዓመቷ ኡጋንዳዊት አዛውንት መንታ ልጆችን በሰላም ተገላገሉ

የ70 ዓመቷ ዩጋንዳዊት ሴት የመካንነት IVF ህክምና ከተደረገላቸው በኋላ መንታ ልጆችን ወልዳለች።

ህጻናትን የወለደችበት ሆስፒታል በአፍሪካ የመጀመሪያዋ ሴት ሆናለች ሲል ይፋ አድርጓል። በኡጋንዳ ዋና ከተማ ካምፓላ የሚገኘው የሴቶች ሆስፒታል ኢንተርናሽናል እና የወሊድ ማእከል ሳፊና ናሙኩዋያ የተባለችው የ70 ዓመት አዛውንት ወንድ እና አንዲት ሴት ልጅ እንደወለደች አስታውቋል።

ወ/ሮ ናሙክዋያ በተሳካ ሁኔታ መገላገላቸውን ተከትሎ ይህ ታሪክ በህክምና ስኬት ላይ ብቻ ሳይሆን በሰው ልጅ የመንፈስ ጥንካሬ ላይ ያተኮረ ነው ሲል ሆስፒታሉ በፌስቡክ ገፁ ላይ አጋርቷል። ወይዘሮ ናሙኩዋያ በ2020 በ67 ዓመታቸው ሴት ልጅ ከወለዱ በኃላ በሦስት ዓመታት ውስጥ  የአሁኑ ለሁለተኛ ጊዜ እንደሆነ የዩጋንዳው ኤንቲቪ ቻናል ዘግቧል።

ወ/ሮ ናሙክዋያ በእርግዝና ወቅት ብዙ ችግሮች እንዳጋጠሟት ተናግራለች፣ ከእነዚህም መካከል የልጆቹ አባት ቤቱል ለቆ ጠፍቶ ነበር ብላለች። ለወንዶች ከአንድ በላይ ልጅ ነፍሰ ጡር እንደሆንክ ስትነግራቸው አይወዱም እኔ መንታ ልጆችን ማርገዜን ከነገርኩት ጊዜ ጀምሮ የኔ ሰው መጥቶ አያውቅም ብላለች።

ወይዘሮ ናሙኩዋያ ልጆቹን እንዴት ማሳደግ እንደምትችል እንደማታውቅ ትገልጻለች። ገር ግን ልጅ አልባ በመሆናችን የተነሳ ለብዙ አመታት ከዘለቀው መገለል እና መሳለቂያ ከመሆናችን በኃላ በመሆኑ ደስተኛ ነኝ ብላለች።

ልጅ ሳላገኝ እንድሞት በእናቴ ተረግሜአለሁ ብዬ አስብ ነበር ስትል አክላለች።

በስምኦን ደረጄ

መደበኛ ያልሆነ

ህዳር 20፤2016 – በአዲስአበባ ባለፉት ሶስት ወራት የቴክኒክ ምርመራ ከተደረገላቸዉ ተሽከርካሪዎች ዉስጥ ከ 3 ሺህ በላይ ያህሉ ምርመራዉን ወድቀዋል ተባለ

የአዲስአበባ አሽከርካሪ ተሽከርካሪ ፈቃድ ቁጥጥር ባለስልጣን ባለፉት ሶስት ወራት ከ 90 ሺህ በላይ ለሆኑ ተሽከርካሪዎች የቴክኒክ ምርመራ አድርጎ ብቁነታቸዉ መረጋገጡን አስታውቋል።

ሆኖም በምርመራዉ ወቅት የተለያየ ጉድለት ተገኝቶባቸዉ ብቁ ያልነበሩ እና ምርመራዉን የወደቁ ከ 3 ሺህ በላይ ተሽከርካሪዎች ባለፉት ሶስት ወራት መገኘታቸዉን በአዲስአበባ አሽከርካሪ ተሽከርካሪ ፈቃድ ቁጥጥር ባለስልጣን የተሽከርካሪ ዘርፍ ምክትል ስራ አስኪያጅ አቶ በድሉ ሌሊሳ ለብስራት ራዲዮና ቴሌቪዥን ተናግረዋል።

ባለስልጣኑ ፤ የቴክኒክ ምርመራዉን በቴክኖሎጂ የታገዘ በማድረጉ የተሽከርካሪዎችን ማህደር መያዝ እንዲችል አስችሎታል። በዚህም ከዚህ ቀደም ምርመራዉን ወድቀዉ ወደ አገልግሎት የሚወጡ ተሽከርካሪዎችን መቆጣጠር እንደሚያስችል ኃላፊዉ ጠቅሰዋል።

ባለስልጣኑ ከዚህ በተጨማሪም ምርመራዉን አልፈዉ ከጊዜ በኋላ የተለያየ ጉደለት የተገኘባቸዉን ጨምሮ ባልተገባ መልኩ ቦሎ ባገኙ 1 ሺህ 400 ያህል ተሽከርካሪዎች ላይ ባለስልጣኑ ባደረገዉ ድንገተኛ የመንገድ ላይ ፍተሻ 35 በመቶ ያህሉ ለአደጋ አጋላጭ የሆነ ጉድለት ተገኝቶባቸዋል ብለዋል።

በሌላ በኩል በከተማዋ 7 ሺህ 600 አዳዲስ ተሽከርካሪዎችም በሶስት ወራት ዉስጥ ተመዝግበዉ ሰሌዳ ማግኘታቸዉንም አቶ በድሉ ገልጸዋል።

ባለስልጣኑ ከሚሰጣቸዉ አገልግሎቶች ሌላኛዉ በሆነዉ የስም ወይንም የባለቤትነት ዝዉዉር ለ12 ሺህ 240 ተሽከርካሪዎች የባለቤትነት ስም ዝዉዉር መደረጉን የአዲስአበባ አሽከርካሪ ተሽከርካሪ ፈቃድ ቁጥጥር ባለስልጣን የተሽከርካሪ ዘርፍ ም/ል ስራ አስኪያጅ አቶ በድሉ ሌሊሳ ጨምረዉ ለብስራት ራዲዮና ቴሌቪዥን ተናግረዋል።

በበረከት ሞገስ

መደበኛ ያልሆነ

ህዳር 19፤2016-በኢትዮጵያ ከአራት ሴቶች በአንዷ ላይ ፆታዊ ጥቃት ይፈፀማል ተባለ

በኢትዮጵያ ከአራት ሴቶች መካከል በአንዷላይ የአካላዊ ወይም ወሲባዊ ጥቃት እንደሚፈፀም የአውሮጳ ህብረት በኢትዮጵያ አስታውቋል ።

ጥቃቱ በኢትዮጵያ ብቻ ሳይሆን በአፍሪካም ተመሳሳይ ስለመሆኑ የተገለፀ ሲሆን በጉዳዩ ላይ የግንዛቤ ማስጨበጫ ስራ መስራት ይገባል ተብሏል ። ጥቃቱ የሰብዓዊ መብት ጥሰት ነው የተባለ ሲሆን የጉዳቱ ሰለባዎች አካላዊ እና ስነልቦናዊ ጉዳት እንደሚገጥማቸው ተገልጿል ።

የፆታዊ ጥቃት አይነቶች አራት ሲሆኑ አካላዊ፣ ቃላዊ፣ ስነልቦናዊ እና ወሲባዊ ጥቃት ተብለው ተቀምጠዋል ። ከነዚህም መካከል አካላዊ ጥቃት በጉልበት በሴቷ ሰውነት ላይ ጉዳት ማድረስ ሲሆን የቃላት ጥቃት ደግሞ ክብርና ስብዕናን የሚነካ አፀያፊ ቃላትን በመጠቀም መሳደብ እንደሆነ ተነግሯል ።

በተጨማሪም የስነልቦናዊ ጥቃት ተብሎ የተቀመጠው ሰውን በቃላት እና በድርጊት እንዲሁም መተንኮስ ፣ ስብዕናን ማንቋሸሽ ፣ ማሸማቀቅ እና ማዋረድ ሲሆን ወሲባዊ ጥቃት ደግሞ ያለፍላጎት እና ያለፈቃደኝነት በማታለልም ሆነ በጉልበት አስገድዶ ወሲብ መፈፀም እንደሆነ ተገልጿል ።

በአበረ ስሜነህ

መደበኛ ያልሆነ

ህዳር 19፤2016 –በደቡብ ኢትዮጵያ ከ1.2 ሚሊዮን ብር በላይ ዋጋ ያላችው ምርቶች እንዲወደጉ ተደረገ

የኢትዮጵያ ምግብና መድኃኒት ባለስልጣን የደቡብ ኢትዮጵያ ቅርንጫፍ ጽ/ቤት ባለፈው የጥቅምት ወር ላይ ባደገው ቁጥጥር  ከ1.2 ሚሊዮን ብር በላይ ዋጋ ያላችው ምርቶች እንዲወደጉ መደረጉን ባለስልጣኑ አስታውቋል፡፡

በ15 የምግብ አምራች ተቋማት ላይ የድህረ ፍቃድ ቁጥጥር  ማድረጉን  እና የድህረ ፍቃድ ቁጥጥር ከተደረገባቸው መካከል  ደግሞ የአሰራር ክፍተት ባሳዩ 6 ድርጅቶች ላይ የጽሑፍ ማስጠንቀቂያ  እንደተሰጣቸው እና ለ3 ተቋማት ደግሞ የቃል ማስጠንቀቂያ መስጠቱን የባለስልጣኑ የኮምኒኬሽን እና ህዝብ ግንኙነት ዳይሬክቶሬት ዳይሬክተር አቶ አበራ ደመቀ ለብስራት ሬድዮ እና ቴሌቭዥን ተናግረዋል ፡፡

ከዚህ በተጨማሪ ከደረጃ በታች፣ የደህንንት ችግር ያለባቸው ፣የመጠቀሚያ ጊዜ ያለፈባቸው ምርቶች ላይ በተለያዩ አስመጪዎች፣ ጅምላ አከፋፈዮች ፣ሸቀጣሸቀጦች ፣በችርቻሮ ሱቆች ላይ ምርት ተኮር የገበያ ቅኝት ቁጥጥር ስራ እንደተሰራ ገልፀዋል፡፡

አክለውም በደቡብ ምዕራብ ቅርንጫፍ ጽ/ቤት ከ1.2 ሚሊዮን ብር በላይ ዋጋ ያላችው ምርቶች እንዲወደጉ መደረጉን የባለስልጣኑ የኮምኒኬሽን እና ህዝብ ግንኙነት ዳይሬክቶሬት ዳይሬክተር አቶ አበራ ደመቀ ጨምረው ለጣቢያችን ተናግረዋል፡፡

በምህረት ታደሰ

መደበኛ ያልሆነ

ህዳር 19፤2016 –በነዳጅ ማጠራቀሚያ ሰልቫትዮ ጎን በድብቅ በተሰራ ሳጥን ውስጥ 217 የሞባይል የእጅ ስልኮች ተያዙ

በስውር በተሰራ የተሽከርካሪ አካል ውስጥ ከሶስት ሚሊዮን ብር በላይ የሚገመት የእጅ ስልኮችን በድብቅ ሲያዘዋውር የነበረ ግለሰብ በቁጥጥር ስር መዋሉን የምስራቅ ሸዋ ዞን ፖሊስ መምሪያ አስታውቋል።ተከሳሹ በተሽከርካሪው የደበቀውን  ስልኮች ወደ አዲስ አበባ ለማስገባት ሲሞክር እንደነበረ የመምሪያው ኃላፊ ረዳት ኮሚሽነር ታሪኩ ዲርባ በተለይ ለብስራት ሬዲዮ እና ቴሌቪዥን ተናግረዋል።

የሰሌዳ ቁጥር ኮድ 2 ኤ 65016 ፒክ አፕ ቶዮታ ተሽከርካሪ ላይ የነዳጅ ማጠራቀሚያ ሰልቫትዮ ጎን በስውር በተሰራ ሳጥን ደብቆት እንደነበር ተጠቁሟል። ብዛቱ  217 የሆነ የተለያዩ የእጅ ስልኮች በቁጥጥር  ሰር ማዋል ተችሏል። ተሽከርካሪው የተነሳው  ከምዕራብ አርሲ ዞን  ሲርና ወረዳ ሲሆን በድብቅ ወደ አዲስ አበባ ሊገባ የነበረውን ግምታዊ ዋጋቸው ከ3 ሚሊዮን ብር በላይ የሚያወጡ ስልኮች እንደጫነ ተገልጿል።

በተጨማሪም አሽከርካሪው በቁጥጥር ስር ውሎ ምርመራ እየተጣራበት  እንደሚገኝ እና  የኮንትሮባንድ ንግድን ለመግታት ከአፋር ክልል እና  ከአዋሽ ኬላዎች ጋር በጥምረት እየተሰራ እንደሆነም ተመላክቷል ። በሌላ በኩል ባለፉት አራት ወራት ውስጥ ብቻ በምስራቅ ሸዋ ዞን የኮንትሮባንድ  እንቅስቃሴን  ለመቆጣጠር  በተወሰደ እርምጃ  93 ሚሊዮን ብር የሚሆን የተለያዩ ቁሳቁሶች  በቁጥጥር  ስር ውለው ለኢትዮጵያ ጉምሩክ ባለስልጣን አዳማ ቅርንጫፍ ገቢ መደረጋቸውን ረዳት ኮሚሽነር ታሪኩ ዲርባ ጨምረው ለብስራት ሬዲዮ እና ቴሌቪዥን ተናግረዋል።

በኤደን ሽመልስ