መደበኛ ያልሆነ

ባለፉት 2 ቀናት ብቻ ተሽከርካሪዎችና ከ2. 3 ሚሊዮን ብር በላይ የኮንትሮባንድ እቃዎች ተያዙ።

የገቢዎች ሚኒስቴር እና የጉምሩክ ኮሚሽን ሕግን ለማስከበር እየሠሩት ባለው ሥራ ባለፉት ሁለት ቀናት ብቻ በተለያዩ የጉምሩክ የፍተሻ ኬላዎች የተለያዩ ኮንትሮባንድ ዕቃዎች መያዛቸው ተገልጿል።በዚህም መሠረት ነሐሴ 21 ቀን 2011 ዓ.ም የሰሌዳ ቁጥሩ ኦሮ 3-66095 የሆነ ሚኒባስ ግምታዊ ዋጋቸው 290 ሺህ ብር የሆኑ የተለያዩ አልባሳት ጭኖ ከአወዳይ ከተማ ወደ ምሥራቅ ሐረርጌ ሲንቀሳቀስ መያዙ ታውቋል።

በተመሳሳይ ቀን የሰሌዳ ቁጥሩ ድሬ 3-04756 የሆነ ሀይሉክስ መኪና ግምታዊ ዋጋቸው 80 ሺህ ብር የሆኑ የተለያዩ የኮንትሮባንድ ዕቃዎች ጭኖ ሲንቀሳቀስ በክልሉ ፖሊስ ኮንትሮባንድ መከላከል ቡድን ተይዟል።በዚያው ዕለት የሰሌዳ ቁጥር ሱማ 3-00607 የሆነ ተሽከርካሪ 1.5 ሚሊዮን ብር የሚገመት ኮንትሮባንድ ዕቃ ጭኖ ሲንቀሳቀስ አውበሬ መቆጣጠርያ ጣቢያ ላይ በቁጥጥር ስር መዋሉ ተገልጿል።ነሐሴ 22 ቀን 2011 ዓ.ም ደግሞ ሱማ 3-04446 የሚል ሐሰተኛ ታርጋ የለጠፈ ተሽከርካሪ ጂግጂጋ አካባቢ ሲንቀሳቀስ የኮንትሮባንድ መከላከል ሠራተኞች ከክልሉ ፖሊስ ጋር በመተባበር በቁጥጥር ስር ማዋላቸውን የገቢዎች ሚኒስቴር አስታውቋል።

መደበኛ ያልሆነ

ሚድሮክ ኢትዮጵያ ለተማሪዎች ከ11 ሚሊየን ብር በላይ የሚገመት የደብተር ድጋፍ አደረገ፡፡

ሚድሮክ ኢትዮጵያ በአዲስ አበባ ከተማ ለሚገኙ የመንግስት ት/ቤት ተማሪዎች ከ11 ሚሊየን ብር በላይ የሚገመት የደብተር ድጋፍ አድርጓል፡፡

በተጨማሪም ሚድሮክ ኢትዮጵያ የፊታችን ጳጉሜ 3 ለሚካሄደው ብሄራዊ የኩራት ቀን “አዲስ አበባ ቤቴ ፤ ኢትዮጵያዊነቴ ኩራቴ!” የሚል ፅሁፍ ያረፈበት 100 ሺ ትሸርቶችን አዘጋጅቶ ለከተማ አስተዳደሩ ለማስረከብ ቃል ገብቷል፡፡

የከተማ አስተዳደሩ ም/ከንቲባ ኢ/ር ታከለ ኡማ የሚድሮክ ኢትዮጵያ ለተማሪዎች ላደረገው የደብተር ድጋፍ በተማሪዎች ፣ በወላጆች እና በከተማ አስተዳደሩ ስም ምስጋናቸውን አቅርበዋል

መደበኛ ያልሆነ

የሳዑዲ መራሹ ጥምር ጦር በየመን ስድስት ጊዜ የአየር ላይ ጥቃት ፈፀመ።

በመዲናዋ ሰንዓ ትናንትና ምሽት ስድስት ጊዜ የአየር ጥቃት ስለመሰንዘሩ የሀገር ውስጥ የመረጃ ምንጭ የሆነው አልማስሪያ ዘግቧል።ጥቃቱ ንፁሃን ላይ ያነጣጠረ ስለመሆኑም ተገልፃል።ስለጥቃቱ ተጎጂዎች ግን የተባለ ነገር የለም። የጥምር ቡድኑ ጥቃት ንፁሃንን ተጎጂ ከማድረግ ባለፋ 45 በመቶ የየመንን የመሰረተ ልማት አውታር በማውደም ክፉኛ ሀገሪቱን ጎድቷል።የየመን የፓለቲካ ምክርቤት ሀላፊ ሞሃመድ አል ሃውቲ በጥምር ቡድኑ ውስጥ አባል የሆኑ ሀገራትን የመንን ለመከፋፈል ቢሞክሩም አልተሳካላቸውም ብለዋል።ከመጋቢት 2015 አንስቶ በቀጠለው የየመን ቀውስ ሳዑዲ የሀዲ ሀይሎችን ወደ ስልጣን ለመመለስ በየእለቱ 2 ሚሊየን የአሜሪካ ዶላር ፈሰስ ብታደርግም ውጤት ልታገኝ አልቻለችም።

መደበኛ ያልሆነ

በሆንግ ኮንግ ተቃውሞ ዙሪያ በቻይና መንግስት የሚደገፉ የቲውተር እና የፌስቡክ ገጾች መታገዳቸውንም ተሰማ።

ቲውተር በቻይና የተከፈቱ እና በሆንግ ኮንግ ተቃውሞ ዘሪያ ያልተገባ ብሎም ያልተረጋገጠ መረጃን ሲያናፍሱ ነበረ ያላቸውን 936 ገጾች ዘግቷል።ቲውተር በሆንግ ኮንግ ተቃውሞ ዙሪያ ፀብ ጫሪ የሆኑ ከ200ሺ ያላነሱ ገጾች እንዳሉም ገልጿል።የፌስቡክ የሳይበር ደህንነት ፓሊሲ ናትናኤል ግሊቸር ተመሳሳዩ እርምጃ ስለመወሰዱ ተናግረዋል።በቀጠለው የሆንግ ኮንግ ተቃውሞ ዙሪያ ቻይና ምዕራባዊያኑ በጉዳዩ ጣልቃ ለመግባት እየሰሩ ይገኛሉ ትላለች ። ሆኖም ግን ለ11 ተከታታይ ሳምንታት የሆንግ ኮንግ ሰልፈኞች ቤጂንግን እያወገዙ ይገኛል።ቻይና ተቃውሞን ከአሸባሪነት ጎራ ፈርጃዋለች።

መደበኛ ያልሆነ

ዋልያዎቹ ለ2022 የኳታር የዓለም ዋንጫ ከሌሴቶ ጋር ለሚያድረጉት ጨዋታ 24 ተጫዋቾች ተጠሩ።

የኢትዮጵያ ብሄራዊ ቡድን ለ2022 የኳታር የዓለም ዋንጫ ቅድመ ማጣሪያ ከሌሴቶ ጋር ለሚያድርገው ጨዋታ 24 ተጫዋቾች ተጠሩ፡፡

የኢትዮጵያ ብሔራዊ ቡድን ከሌሴቶ ብሔራዊ ቡድን ጋር ነሐሴ 29 እና ጳጉሜ 3 በደርሶ መልስ ለሚያደርገው ጨዋታ የብሄራዊ ቡድኑ አሰልጣኝ አብርሃም መብራቱ ለ24 ተጫዋቾች ጥሪ አድርገዋል፡፡

ከ24ቱ ተጫዋቾች በተጨማሪ በኖርዌይ አንደኛ ዲቪዚዮን የሚጫወቱት ሁለት ተጫዋቾች ማለትም ስትሮምጎድሴት እግር ኳስ ክለብ በግብ ጠባቂነት የሚጫወተው ዳንኤል ንጉሴ፣ በሳርፕስበርግ እግር ኳስ ክለብ የአማካይ አጥቂ በመሆን ሚጫወተው አሚር አስካር እንዲሁም በጀርመን ሁለተኛ ዲቪዚዮን በሚገኝ ክለብ በተከላካይ ስፍራ የሚጫወተው ካሊድ ሙሉጌታ በአሰልጣኝ አብርሃም ጥሪ ተደርጎላቸዋል፡፡

ጥሪ የተደረገላቸው ተጫዋቾችም፦

1 ጀማል ጣሰው – ግብ ጠባቂ – ፋሲል ከነማ

2 ምንተስኖት አሎ – ግብ ጠባቂ- ባህር ዳር ከተማ

3 ለዓለም ብርሃኑ -ግብ ጠባቂ – ቅዱስ ጊዮርጊስ

4 አስቻለው ታመነ – ተከላካይ – ቅዱስ ጊዮርጊስ

5 ያሬድ ባዬ -ተከላካይ – ፋሲል ከነማ

6 አንተነህ ተስፋዬ – ተከላካይ – ድሬዳዋ ከተማ

7 ረመዳን የሱፍ – ተከላካይ – ስሁል ሽረ

8 አምሳሉ ጥላሁን – ተከላካይ – ፋሲል ከነማ

9 አህመድ ረሽድ – ተከላካይ – ኢትዮጵያ ቡና

10 ደስታ ደሙ – ተከላካይ – ወልዋሎ አዲግራት ዩንቨርሲቲ

11 ዮናስ በርታ – ተከላካይ – ደቡብ ፖሊስ

12 ጋቶች ፓኖም – አማካኝ – አልጉዋና

13 አማኑኤል ዮሃንስ – አማካኝ – ኢትዮጵያ ቡና

14 ከነዓን ማርክነህ – አማከኝ – አዳማ ከተማ

15 ሀይደር ሸረፋ – አማካኝ – መቐለ 70 አንድርታ

16 ሽመልስ በቀለ – አማካኝ -አልመካሳ

17 ታፈሰ ሰለሞን – አማካኝ – ሐዋሳ ከተማ

18 ሱራፌል ደኛቸው – አማካኝ – ፋሲል ከነማ

19 አማኑኤል ገ/ሚካኤል -አጥቂ – መቐለ 70 እንድርታ

20 ዑመድ ኡክሪ – አጥቂ – አልሱሙማ

21 ቢኒያም በላይ – አጥቂ – ሱሪያንስ

22 አዲስ ግደይ – አጥቂ – ሲዳማ ቡና

23 ሙጅብ ቃሲም – አጥቂ – ፋሲል ከነማ

24 መስፍን ታፈሠ – አጥቂ – ሐዋሳ ከተማ

መደበኛ ያልሆነ

በአዲስ አበባ ለሚገኙ መምህራን የትምህርት ዝግጅትና ቁጥጥር የሚያደርጉበት እንዲሁም

የትምህርት እቅድ የሚያወጡበት ታብሌት ሊሰጥ ነው።ለዚህ የሚረዱ የቴክኖሎጂ መሰረተ ልማት ስራዎች እየተከናወኑም ይገኛሉ።

ታብሌቶቹ በሳተላይት የሚገናኙ ሲሆን መረጃዎችን ወደ ማእከል የሚልኩበት መተግበሪያዎችን
ያካተተም ይሆናል።

ከታብሌቶቹ በተጨማሪም የከተማ አስተዳደሩ ዓርማ ያረፈበት ቦርሳ እና ደረጃውን የጠበቀ ገዋን ለለመምህራን የሚያቀርብ ይሆናል።

በመምህራን የሚነሱ የተለያዩ ጥያቄዎችን ለመመለስም የከተማ አስተዳደሩ ትኩረት ተሰጥቶ
እየተሰራ እንደሚገኝ ከከንቲባ ፅ/ቤት ያገኘነው መረጃ ያመላክታል።

መደበኛ ያልሆነ

በባሕር ዳር አንድ የመንግስት የስራ ሀላፊ የአሲድ ጥቃት ተፈጸመባቸው

ለበቀል የተነሳች ሴት በአማራ ብሔራዊ ክልላዊ መንግሥት የመንገድ ትራንስፖርት ቢሮ የስምሪት ዳይሬክቶሬት ዳይሬከተር ላይ የአሲድ ጥቃት ፈጽማለች፡፡

ግለሰቧ የስራ ሀላፊው ላይ የአሲድ ጥቃት የፈጸመችው ነሐሴ 02 ቀን 2011 ዓ.ም በባህር ዳር ከተማ ነው ተብሏል፡፡

የባሕር ዳር ከተማ 3ኛ ፖሊስ ጣቢያ የምርመራ የሥራ ሂደት አባል የሆኑት ምክትል ኢንስፔክተር ይስማው ታሪኩ ተጠርጣሪዋ ጥቃቱን ለመፈጸም አሲድ ገዝታ ነሐሴ 2 ቀን 2011 ዓ.ም ጠዋት ላይ ወደ ዳይሬክተሩ ቢሮ እንደሄደች ነገር ግን ስብስባ ላይ ናቸው ተብላ እንደተመለሰች ፤

ከሰዓት በኋላ ስትመለስ ግን የስራ ሀላፊው ቢሯቸው ውስጥ በሥራ ላይ እንዳሉ እንዳገኝቻቸውና በጆግ ይዛው የመጣችውን አሲድ ከቅርብ እርቀት ላይ ሆና እንደደፋችባቸው ከዚያም ምን እንደተከሰተ መለስ ብላ ሳታይ እሩጣ እንደወጣች ቃሏን ለፖሊስ ሰጥታለች ብለዋል፡፡

ተጠርጣሪዋ ድርጊቱን ፈጽማ ለማምለጥ ብትሞክርም በአካባቢው በነበሩ ሰዎች ትብብር በቁጥጥር ሥር የዋለች ሲሆን ጥቃቱ የተፈጸመባቸው የስራ ሀላፊም ወዲያውኑ ወደ ሐኪም ቤት ተወስደው ህክምና እንዲያገኙ ተደርጓል ተብሏል።

የክልሉ የመንገድ ትራንስፖርት ቢሮ የስምሪት ዳይሬክቶሬት ዳይሬከተር አቶ ደመላሽ ስንሻው በተፈጸመባቸው የአሲድ ጥቃጥ በሁለት እጆቻቸው እና ሆዳቸው አካባቢ የመጥቆርና የማበጥ እንዲሁም ፊታቸው ላይ አልፎ አልፎ የመቃጠል ጉዳት ደርሶባቸዋል ተብሏል፡፡

ተጠርጣሪዋ ጥቃቱን ለመፈጸም የተጠቀመችበትን አሲድ ለመኪና ባትሪ በሚል እንደገዛችው ለፖሊስ የተናገረች ሲሆን ፖሊስም የአሲዱን ምንጭ ለማወቅ ምርመራ እያደረገ መሆኑን ተናግሯል።

ምክትል ኢንስፔክተር ይስማው ታሪኩ ግለሰቧ በ2008 ዓ.ም በህጋዊ መንገድ ‘እፎይታ’ በሚባል ማህበር የተመዘገበ ባጃጅ መግዛቷን እና በዚህም ለተወሰነ ግዜ የስምሪት መርሃ ግብር ወጥቶላት ባጃጇ በሥራ ላይ ተሰማርቶ መቆየቱን ተናግረዋል።

ኢንስፔክተር ይስማው ጨምረውም “በኋላ ላይ ተጠርጣሪዋ ‘ምክንያቱን አላውቀውም’ በምትለው ሁኔታ የማህበሩ ታፔላ እንዲነሳ ተደርገ፤ ባጃጇም እንድትያዝ ተደረገች” ይላሉ።
ግለሰቧ ይህ እንዲሆን ያደረገው ቀደም ሲል የባሕር ዳር መንገድ ትራንስፖርት ጽህፈት ቤት ኃላፊ የነበሩት እና አሁን የክልሉ መንገድና ትራንስፖርት ቢሮ የስምሪት ዳይሬክቶሬት ዳይሬከተር የሆኑት አቶ ደመላሽ ስንሻው ናቸው ብላ ማሰቧን ፖሊስ ተናግሯል።

ጥቃቱ የተፈጸመባቸው አቶ ደመላሽን በሥራቸው ግለሰቧን ኢላማ እንዳላደረጉና ሌሎችም ከስምሪት ቦታቸው ውጪ የሚሰሩ ባጃጆችን ሥርዓት ለማስከበር ሲባል ሌሎችም እንደተያዙ ለፖሊስ ተናግረዋል።

ስሞኦን ደረጀ

መደበኛ ያልሆነ

ኮ አክሽን መስማት የተሳናቸው መዋዕለ ህፃናት ት/ቤት የመፈራረስ አደጋ ተጋርጦበታል

ት/ቤቱ ለበርካታ መስማት የተሳናቸው ህፃናት አስተዋፅኦ በማድረግ ላይ እንደሚገኝ የኢትዮጵያ መስማት የተሳናቸው ብሄራዊ ማህበር መስራች አቶ ተክለሃይማኖት ደርሶ ለብስራት ራዲዮ ተናግረዋል።

ይህንን ዓላማ በማድረግም በኢትዮጵያ የሚገኙ መስማት ለተሳናቸው ዜጎች ትምህርትን ለማዳረስ በእንቅስቃሴ ላይ እንደሚገኝም ተገልጿል።

አሁን ላይ ትምህርት ቤቱ የመፈራረስ አደጋ እንደተጋረጠበት የገለፁት አቶ ተክለሃይማኖት ፤ አስከፊ በሚባል ደረጃ ላይ እንደሚገኝም አስረድተዋል።

ማህበሩ የእድሳቱን ወጪ መሸፈን እንደማይችልና ፤ አንዳንድ በጎ ፍቃደኞች እንዲሁም የቀድሞ ተማሪዎች ድጋፍ እያደረጉ እንደሚገኝ ነግረውናል።

ሆኖም ለት/ቤቱ እድሳት ከዚህ በላይ ድጋፍ እንደሚያስፈልግና በመንግስት በኩል አስፈላጊው ድጋፍ እየተደረገ አለመሆኑ ተገልጿል።

የአዲስ አበባ ከተማ አስዳደር አሁን ተግባራዊ እያደረገ የሚገኘውን የት/ቤቶች የእድሳትና የጥገና መርሀ ግብር በትምህርት ቤቱም ላይ ተግባራዊ እንዲያደርግ ጥሪ አቅርበዋል።

መደበኛ ያልሆነ

የኢቦላ ወረርሽኝ ወደ ኢትዮጵያ እንዳይገባ ከፍተኛ ቁጥጥር እየተደረገ ይገኛል ተባለ

ወረርሽኙ በዲሞክራቲክ ኮንጎ ጎማ ከተማ በቅርቡ መቀስቀሱ ይታወቃል። በሽታው የዓለም ስጋት ነው ሲል የዓለም የጤና ድርጅት አስታውቋል።

የኢትዮጵያ ህብረተሰብ ጤና ኢንስቲትዩትም በሽታው ወደ ሀገር ውስጥ እንዳይገባ አስፈላጊውን ክትትል እያደረገ ይገኛል ሲሉ የኢስቲትዩቱ ም/ዋና/ዳይሬክተር ዶ/ር በየነ ሞገስ ለብስራት ተናግረዋል።

በተለይም የኢትዮጵያ አየር መንገድ ወደ ዲሞክራቲክ ሪፐብሊክ ኮንጎ በሳምንት 25 በረራዎችን ማድረጉ ጉዳዩን አሳሳቢ ያደርገዋል።

ስለሆነም ወረርሽኙ ከተቀሰቀሰበት ስፍራ ወደ ኢትዮጵያ ለሚገቡ ተጓዞች የመለያ ስፍራዎች የተዘጋጁ ሲሆን ከ 2 እስከ 21 ቀናት ያህል ተገቢው ክትትልና ቁጥጥር እየተከናወነ ይገኛል።

በሽታው በቀላሉ የሚሰራጭ በመሆኑ 2000 ለሚሆኑ ባለሙያዎች ስልጠና ተሰጥቷል።

ከአየር ትራንስፓርት በተጨማሪም በተለያዩ ኬላዎች ላይ ቁጥጥር እየተደረገ ይገኛል።

ሚኪያስ ፀጋዬ

መደበኛ ያልሆነ

ከስንዴ ግዥ ጋር በተያያዘ ሁኔታ ይገዙ ዳባን ጨምሮ 10 ሰዎች ክስ ተመሰረተባቸው

ተከሳሾች እንደ ቅደም ተከተላቸው ይገዙ ዳባ ገቢሳ፣ አቶ መንግስቱ ከበደ ደስታ፣ አቶ ሰለሞን
በትረ ገ/ሥላሴ፣ ሰለሞን አይኒማር ካህሣይ፣ ዮሴፍ ራፊሶ ጉዬ፣ ተ/ብርሃን ገ/መስቀል አበራ፣
ትሩፋት ነጋሽ ገብሬ፣ ዘሪሁን ስለሺ ገድሌ እና ጆንሴ ገደፋ ለታ ናቸው፡፡
ተከሳሾች ከ2010 እስከ 2011 ዓ.ም ባለው ጊዜ ውስጥ ለገበያ ማረጋጊያ ዓላማ በተፈጸመ
ዓለም አቀፍ የስንዴ ግዥ የማይገባ ጥቅም ለማግኘት ፕሮሚሲንግ ኢንተርናሽናል ለሚባል
ድርጅት ለማስገኘት ወይም በመንግስት ጥቅም ላይ ጉዳት ለማድረስ በማሰብ በተሰጣቸው
ኃላፊነት መሠረት ሊጠብቁት እና ሊከላከሉት የሚገባቸውን የመንግስትን ጥቅም የሚጎዳ
ተግባር ለመፈጸም በማሰብ ከ1ኛ እስከ 4ኛ የተዘረዘሩት ተከሳሾች የተሰጣቸውን ኃላፊነት
ተጠቅመው በመመርያውና በውሉ መሠረት የሻኪል ኤንድ ካምፓኒ የወጣውን የ400,000 ሜ/
ቶን ስንዴን ባሸነፈበት 96,400,000 የአሜሪካን ዶላር በውሉ መሠረት የጠየቀውን የውል
ማስከበርያ ማቅረቢያ ተጨማሪ ጊዜ ሰጥተው እንዲያስገባ አድርገዋል፡፡
ከ5ኛ እስከ 9ኛ የተዘረዘሩት ተከሳሾች ለ2ኛ ጊዜ የወጣውንና በሦስት አቅራቢዎች አሸናፊነት
የተጠናቀቀውን ጨረታ ከመመርያ ውጪ የቀረበን የአንድ አባል ሀሳብ ምክንያት በማድረግ
የግዥ ኮሚቴ የሀሳብ ልዩነት አለው በሚል ያልተገባ ምክንያት ጨረታውን ያለአግባብ
እንዲሰረዝ በማድረጋቸው የተሰጣቸውን ኃላፊነት ባለመወጣታቻው በወቅቱ ከቀረበው
የ110,786,000 የአሜሪካን ዶላር እና በመጨረሻ ለ400,000 ሜ/ቶን ስንዴ መንግስት
ከከፈለው 115,492,188.00 ዶላር የአሜሪካን ዶላር አንጻር በልዩነት የተከፈለ 4,706,188
ዶላር በመንግስት ላይ ጉዳት እንድደርስ መደረጉን ከክሱ መረዳት ተችሏል፡፡
እንዲሁም 1ኛ ተከሳሽ ግዥዎቹ በአቅራቢዎች መርከብ እንዲጓጓዝ በማድረግ ሃገሪቱ ከመርከብ
ትራንስፖርት ልታገኝ የምትችለውን 5,895,000 የውጭ ምንዛሪ ወይንም 162,786,888 ብር
በማሳጣት፣ 10ኛ ተከሳሽ ፕሮሚሲንግ ኢንተርናሽናል ጋር በስውር በመመሳጠር በመመርያው
መሰረት በወቅቱ እርምጃ ባለመውሰድ 3,675,000 ዶላር ወይም 101,482,920 ብር ጥቅም
እንዲያገኝ በማድረግ ተከሣሾች በሥራቸው ሥልጣን መሰረት ሊጠብቁት እና ሊከላከሉት
የሚገባውን ጥቅም የሚጎዳ ተግባር በመፈጸም በስንዴ ግዥ ፕሮሚሲንግን ኢንተርናሽናል
የተባለውን ድርጅት ያለአግባብ በመጥቀምና መንግስት ላይ ከፍተኛ ጉዳት በማድረስ እንዲሁም
በሃገሪቱ ውስጥ ከፍተኛ የስንዴ፣ የዱቄትና የዳቦ እጥረት እንዲሁም የዋጋ መናር እንዲከሰት
በማድረግ በዋና ወንጀል አድራጊነት ተካፋይ በመሆን በፈጸሙት የመንግሥት ሥራን በማያመች
አኳኋን መምራት የሙስና ወንጀል ተከሰዋል፡፡
ተከሳሶችም ልደታ ከፍተኛ ፍርድ ቤት 1ኛ ወንጀል ችሎት ቀርበው የቀረበባቸውን ክስ በችሎቱ ተነቦ እንዲረዱት ተደርጓል፡፡ በቀረበበው ክስ ላይ ያለቸውን የክስ መቃወሚያ ይዘው ለመቅረብ
ለግንቦት 06 ቀን 2011 ዓ.ም ተቀጥሯል፡፡