መደበኛ ያልሆነ

ግንቦት 24፣2012-ሩዋንዳ በመዲናዋ ኪጋሊ ከሰልን መጠቀም ከለከለች

ገጠራማ የሩዋንዳ ክፍሎች ወደ ዋና ከተማዋ ኪጋሊ የከሰል ምርት እንዳይገባ የሩዋንዳ መንግስት ክልከላ አሳልፏል።የክልከላው ዓላማ ከሰል ለማክሰል በሚል የሚጨፈጨፈውን የደን ውድመት ለማስቀረት ነው።ሰዎች ፊታቸውን ወደ ጋዝ ተጠቃሚመት እንዲያዞሩ ህጉ ያስገድዳል።

ሩዋንዳ ከኬንያና ከዩጋንዳ በመቀጠል ይህንን ውሳኔ አሳልፋለች።ሆኖም ግን ከኪጋሊ 1.4 ሚሊየን ህዝብ 85 በመቶ ያህሉ ለምግብ ማብሰል ማገዶ ይጠቀማል።

ሚኪያስ ፀጋዬ

መደበኛ ያልሆነ

ግንቦት 24፣2012-በአሜሪካ የተነሳው ተቃውሞ ኔዘርላንድ አምሰተርዳም ደርሷል

በዛሬው እለት በኔዘርላንድ አምስተርዳም በግፍ ህይወቱን በአሜሪካ ላጣው ጆርጅ ፍሎይድ አጋርነት ለማሳየት ሰልፍ ተካሂዷል።10ሺ የሚጠጉ ሰልፈኞች በአምስተርዳም ዳም አደባባይ በመገኘት ድምፃቸውን አሰምተዋል።

ፍትህ ከሌለ ሰላም የለም፣የጥቁር ህይወት ዋጋ አለው ያሉ ሰልፈኞች የትራፊክ እንቅስቃሴውን በመግታት ተቃውመዋል።የ44 ዓመቱ የፖሊስ አባል ድሬክ ቻዩቪን በ500ሺ የአሜሪካን ዶላር ዋስ ተጠይቆበት ከ8 ቀናት በኃላ ፍርድቤት ይቀርባል።

ስምኦን ደረጄ

መደበኛ ያልሆነ

ግንቦት 24፣2012-ራሺያ በድጋሚ የቡድን ሰባት አባል ሀገር እንንድትሆን ካናዳ ድጋፍ አልሰጥም አለች

የአሜሪካው ፕሬዝዳንት ዶናልድ ትራምፕ ራሺያ በድጋሚ የቡድን ሰባት አባል እንድትሆን ላቀረቡት ጥያቄ ካናዳ ድጋፍ እንደማትሰጥ አስታውቃለች።ራሺያ አለምአቀፍ ህጎችን ተግባራዊ ለማድረግ አሁንም ፍቃደኛ አይደለችም ሲሉ የካናዳ ጠቅላይ ሚንስትር ጀስቲን ትሩዶ ተናግረዋል።

ራሺያ በ2014 ከዩክሬን ክሪሚያን በህዝበ ውሳኔ ወደ ራሷ መጠቅለሏ ከቡድን 7 እንድትወገድ ምክንያት ሆኗል።ትራምፕ የቡድን ሰባት ቀጣይ ስብሰባ እስከ መስከረም ይራዘም በስብስቡ ላይ ሩሲያ፣አውስትራሊያ፣ህንድና ደቡብ ኮርያ ይጋበዙ ሲሉ ተናግረዋል።

ስምኦን ደረጄ

መደበኛ ያልሆነ

ግንቦት 24፣2012-የብስራት አመሻሽ አጫጭር መረጃዎች

~ አሜሪካ ከአለም የጤና ድርጅት ጋር ያለኝን ግንኙነት አቋርጣለው ማለቷን ቻይና ተቸች። የቻይና የውጪ ጉዳይ ሚንስትር ቃል አቀባይ ሊጅአን አሜሪካ ራስ ወዳድ አስተዳደሯም ሀላፊነት አይሰማውም ብለዋል።

~ በስፔን ባለፉት 24 ሰዓት በኮሮና ቫይረስ ሞት አልተመዘገበም። በአንፃሩ በኢራን በሁለት ወር ውስጥ ከፍተኛ የተባለ የቫይረሱ ስርጭት ሲመዘገብ ባለፉት 24 ሰዓት 2,979 ሰዎች ተጠቅተዋል።

~ በደቡብ አፍሪካ ከኮሮና ቫይረስ ወረርሽኝ ጋር ተያይዞ ተጥሎ የነበረው የአልኮል ሽያጭ ክልከላ ተነሳ።ከሁለት ወር በኃላ ለመጀመሪያ ጊዜ ተፈቅዷል።

~ ዩጋንዳን ከደቡብ ሱዳን የሚያዋስናት ድንበር በኮሮና ቫይረስ ምክንያት መዘጋቱን በመቃወም ሰልፍ ከወጡ ሰዎች መካከል ሁለቱ የፓርላማ አባላት ሲሆኑ ፖሊስ በቁጥጥር ስር እንዳዋላቸው አስታውቋል።

~ የራሺያ መዲና ሞስኮ በኮሮና ቫይረስ ወረርሽኝ የተነሳ ዜጎች ከቤት እንዳይወጡ ያስቀመጠችውን ክልከላ ከ9 ሳምንት በኋላ በዛሬው እለት አነሳች። በግሪክና ፖርቹጋል ደግሞ ሲኒማ ቤቶች ዳግም ተከፍተዋል።

~ በቺሊ የኮሮና ቫይረስ ተጠቂዎች ቁጥር 100ሺ እየተጠጋ ሲሆን ፤ በጎረቤቷ ቦሊቪያ ከተመዘገበው በአስር እጥፍ የበለጠ ሆኗል። ቦሊቪያ በአንፃሩ እንቅስቃሴ የሚከለክሉ ህጎች ላይ በዛሬው እለት ማሻሻያ አድርጋለች።

~ በተባበሩት አረብ ኢምሬትስ ማረሚያ ቤት ውስጥ የነበረ የኦማን ዜግነት ያለው ሰው ላይ የኮሮና ቫይረስ ተገኘበት። ድርጊቱን ተከትሎ የሰብዓዊ መብት ተሟጋቾች ኢምሬትስ የታራሚዎችን ቁጥር እንድትቀንስ ጫና እያደረጉ ይገኛል።

ስምኦን ደረጄ

መደበኛ ያልሆነ

ግንቦት 24፤2012-በኢትዮጲያ ባለፉት 24 ሰዓት ተጨማሪ 85 ሰዎች ላይ የኮሮና ቫይረስ ተገኘባቸው

በኢትዮጵያ በኮሮና ቫይረስ ህይወታቸውን ያጡ ሰዎች ቁጥር 12 ደረሰ፤ የአንድ ወር ጨቅላ ህፃን በቫይረሱ ተይዟል

~ የ30 ዓመት ወንድ ኢትዮጲያዊ ተጓዳኝ ህመም ያለባት በኤካ ኮተቤ ህክምናውን ሲከታታል ቆይቶ በትላንትናው እለት ህይወቱ አልፏል።

በኢትዮጲያ ባለፉት 24 ሰዓት ተጨማሪ 85 ሰዎች ላይ የኮሮና ቫይረስ ተገኘባቸው

በአጠቃላይ በኮሮና ቫይረስ የተያዙ ሰዎች ቁጥር 1257 ደርሷል፡፡

የታማሚዎች ዝርዝር ሁኔታ፡-

~ ባለፉት 24 ሰዓት ዉስጥ ለ 2926 ሰዎች ምርመራ ተደርጎ 85 ኢትዮጲያዉያን ላይ ቫይረሱ ተገኝቷል፡፡

~51 ዱ ወንዶች ሲሆኑ 34 ቱ ደግሞ ሴቶች ናቸው።እድሜያቸዉ ከ1 ወር እስከ 65 ዓመት የሆኑ ናቸዉ።

~ የመኖሪያ ስፍራቸዉ 72 ሰዎች ከአዲስ አበባ፣ 5 ሰዎች ከኦሮሚያ ክልል፣4 ሰዎች ከትግራይ ክልል፣3 ሰዎች ከሶማሌ ክልል፣1 ሰው ከአማራ ክልል

~ 19 ሰዎች የውጭ ሀገራት የጉዞ ታሪክ ያላቸው ናቸው፡፡

~ 18 ሰዎች በበሽታው ከተያዘ ሰው ጋር ግንኙነት አላቸዉ፡፡

~ የውጭ ሀገር የጉዞ ታሪክና በበሽታው ከተያዘ ሰው ጋር ግንኙነት የሌላቸዉ 49 ሰዎች ናቸው።

ተጨማሪ መረጃ ፦

~ አጠቃላይ ምርመራ የተደረገላቸው ሰዎች ቁጥር 112,377 ደርሷል።

~ ባለፉት 24 ሰዓት ውስጥ 8 ሰዎች አገግመዋል።( 3 ከኦሮሚያ እና 5 ከአዲስ አበባ)

~ አጠቃላይ ያገገሙ ግለሰቦች 217 ደርሰዋል።

~ በጽኑ ህሙማን ማከምያ ዉስጥ የሚገኝ አራት ታማሚዎች አሉ ፡፡

~ በለይቶ ህክምና ውስጥ ያሉ 1026 ናቸው።

~ የ 12 ሰዎች ህይወት አልፏል፡፡

መደበኛ ያልሆነ

ግንቦት 24፤2012-አሜሪካ ለብራዚል 2 ሚሊዮን ዶዝ ሀይድሮክሲክሎሮኪውን የተሰኘውን መድሃኒት መላኳ ተሰማ ፡ የብራዚሉ ፕሬዝዳንት ለወላጅ እናቴ መድሃኒቱን ገዝቼ ሳጥን ውስጥ አስቀምጫለው አሉ

የዓለም የጤና ድርጅት ለኮቪድ-19 ህሙማን ይህንን የፀረ ወባ መድሃኒት ሀገራት ከመጠቀም እንዲያቆሙ ቢያደርጉም አንዳንድ ሀገራት ግን ክልከላውን በመጣስ እየተጠቀሙበት ይገኛል፡፡

የዩኤስ ፕሬዝደንት ዶናልድ ትራምፕ ይህንን የፀረ ወባ መድሃኒት ለኮሮና ቫይረስ መከላከያ ይጠቀሙ እንደነበረ ተናግረዋል፡፡

የብራዚሉ አቻቸው ጄር ቦልሴናሮ በበኩላቸው የ 93 ዓመት እድሜ ያላት ወላጅ እናቴ የፀረ ወባ መድሃኒቱ ካስፈለጋት ብዬ በሳጥን ውስጥ ገዝቼ አስቀምጫለው ብለዋል፡፡

የፀረ ወባ መድሃኒት የኮሮና ቫይረስን ለመከላከል ስለመቻሉ ሣይንሳዊ ማስረጃ የለም፡፡

በሚኪያስ ፀጋዬ

መደበኛ ያልሆነ

ግንቦት 24፤2012-ኢራን ለአሜሪካ ባስተላለፈችው መልዕክት መንግስት ህዝቡን ሊሰማ ይገባል ብላለች

የኢራን የውጭ ጉዳይ ሚኒስቴር በትዊተር ገፁ ባስተላለፈው መልዕክት አሜሪካ እንደጨካኝ ውሻ እና ለጦር ፍቅር ያላቸው የትራምፕ አስተዳደር ህዝቡን ሊሰማ ይገባል ብለዋል፡፡

በሀገሪቱ የተስፋፋውን የኮሮና ቫይረስ ወረርሽኝ መከላከሉ ላይ ትኩረት ማድረጉን ትቶ ፤ አስተዳደሩ ለተቃውሞ የወጡ ሰልፈኞችን ለማስፈራራት ተጨማሪ ወታደሮችን መቅጠርና እና አነፍናፊ ውሾችን መጨመሩን ተያይዞታል ብለዋል፡፡

ዩናይትድ ስቴትስ ህዝቧን መስማትና የወደቀ መመሪያዋን ማስተካከል ይኖርባታል ሲሉ ምክራቸውን አክለዋል፡፡

አሜሪካ በኮሮና ቫይረስ 1,837,170 ዜጎቿ የተጠቁ ሲሆን 106,195 የሚሆኑት ደግሞ ህይወታቸው ስለማለፉ ሪፖርት አድርጋለች፡፡

በስምኦን ደረጄ

መደበኛ ያልሆነ

ግንቦት 24፤2012-በደቡብ ኮርያ ከቤተክርስቲያን ጋር በተያያዘ የኮሮና ቫይረስ ተጠቂዎች ቁጥር ጨመረ

በትላንትናው እለት በደቡብ ኮርያ በኮሮና ቫይረስ መያዛቸው ሪፖርት ከተደረጉ ሰዎች መካከል 24ቱ በጊዮንጊ ግዛት በቫይረሱ የተጠቁት በቤተክርስቲያን የአምልኮ ስነስርዓት ከታደሙ በኃላ ነው።አሁንም ከቤተክርሰቲያን ጋር በተያያዘ የቫይረሱ ተጠቂዎች ቁጥር እንዳይጨምር ስጋት ፈጥሯል።

በደቡብ ኮርያ በሺዎች የሚቆጠሩ ሰዎች በወርሃ የካቲት በቤተክርስቲያን የአምልኮ ስነስርዓት ላይ ከታደሙ በኃላ በቫይረሱ መጠቃታቸው ይታወሳል።

በስምኦን ደረጄ

መደበኛ ያልሆነ

ግንቦት 24፤2012-በእስራኤል ፖሊስ ያልታጠቀው ፍልስጤማዊ ተተኩሶበት ህይወቱ ማለፉን ተከትሎ ፤ በመቶዎች የሚቆጠሩ ሰዎች በቀብር ስነስርዓቱ ላይ መታደማቸው ተሰማ፡፡

በጥንታዊቷ እየሩሳሌም ከተማ የ 32 ዓመቱ ያልታጠቀው ፍልስጤማዊ ኢያድ ኬሀያሪ በእስራኤል ወታደር ተተኩሶበት ህይወቱ አልፏል፡፡

ጉዳዩ በሁለቱ ወገኖች መካከል ውጥረትን የፈጠረ ሲሆን የእስራኤል የመከላከያ ሚኒስቴር ቤን ጋንታዝ ‹‹ለተገደለው ፍልስጤማዊ እጅግ በጣም ይቅርታ እንጠይቃለን ፤ የቤተሰቡን ሀዘን የምንጋራው ይሆናል ጉዳዩም ይጣራል›› ሲሉ ተናግረዋል፡፡ በጉዳዩ ዙሪያ የእስራኤል ጠ/ሚ ቤንያሚን ኔታናሁ ዝምታን መርጠዋል፡፡

በዮርዳኖስ ሸለቆ አካባቢ አይሁዶችን የማስፈር ፖሊሲ በሁለቱ ወገኖች መካከል ውጥረት መፍጠሩን ቀጥሏል፡፡

ድርጊቱን እስራኤል ከአሜሪካ አረንጓዴ መብራት ብታገኝበትም ፍልስጤም ፣ የአረብ ሀገራት ፣ የተ.መ.ድ እና በርከት ያሉ የአውሮፓ ሀገራት እየተቹት ይገኛል፡፡

በስምኦን ደረጄ

መደበኛ ያልሆነ

ግንቦት 24፤2012-በግብፅ በ 24 ሰዓታት ውስጥ በኮሮና ቫይረስ ከፍተኛ የተባለው ሞት ተመዘገበ

የግብፅ የጤና ሚኒስቴር እናዳስታወቀው በ 24 ሰዓታት ውስጥ ከፍተኛ የተባለው የሞት መጠን በእለተ እሁድ ተመዝግቧል፡፡

46 ሞት የተመዘገበ ሲሆን በአጠቃላይ በግብፅ በኮሮና ቫይረስ ህይወታቸውን ያጡ ሰዎች ቁጥር 959 ደርሷል፡፡

የቫይረሱ ተጠቂዎች 25ሺህ መድረሱንም የጆን ሆፕኪንስ ዩኒቨርሲቲ መረጃ ያሣያል፡፡

በአፍሪካ በኮሮና ቫይረስ ከፍተኛ የሞት መጠን የተመዘገበው በግብፅ ነው፡፡

በስምኦን ደረጄ