Category: መደበኛ ያልሆነ

የኢትዮጵያ ሰብዓዊ መብቶች ኮሚሽን (ኢሰመኮ) በምስራቅ ወለጋ ዞን ፣ ኪራሙ ወረዳ የሚገኙ ሲቪል ሰዎች ለደህንነታቸው አስጊ ሁኔታ ላይ የሚገኙ መሆናቸው አሳሳቢ መሆኑን ገልጿል።

በወረዳው ቦቃ ቀበሌ ከሚባለው ስፍራ ፣ መስከረም 7 እና 8 2014ዓ.ም በደረሱ 3ተያያዥ ጥቃቶች በአጠቃላይ 18 ሲቪል ሰዎች መገደላቸውን ኮሚሽኑ አስታውቋል። እንዲሁም መስከረም 8 ቀን በውልማይ ቀበሌ በተፈፀመው ሌላ ጥቃት 11 ሰዎች መገደላቸውን ነዋሪዎች ለኮሚሽኑ አሳውቀዋል ነው የተባለው።

በኪራሙ ወረዳ ባለው አሳሳቢ የፀጥታ ሁኔታ ምክንያት ከተለያዩ የወረዳው አካባቢዎች ተፈናቅለው ፣ በኖሌ ቀበሌ በሀሮ እና ኪራሙ ከተሞች ተጠልለው የሚገኙ ከ 40 ሺህ በላይ የሚሆኑ ነዋሪዎች ለወራት አስቸኳይ የሰብዓዊ እርዳታ እና ሌሎች ድጋፎችን ባለማግኘታቸው አስቸጋሪ ሀኔታ ውስጥ እንደሚገኙ ነዋሪዎች ጨምረው መግለፃቸውን ብስራት ራዲዮ ሰምቷል፡፡

በዚህ ወቅት ኪራሙ ወረዳ ከቡሬ እና ነቀምቴ ከተሞች ጋር የሚያገናኙ ዋና ዋና መንገዶች ፣ የተሽከርካሪ እንቅስቃሴ ተዘግተው እንደሚገኙ ኮሚሽኑ አረጋግጧል፡፡

ኢሰማኮ ፣ የፌደራልና የክልል መንግስታት የጸጥታ ሃይሎች በኪራሙ ወረዳ ላለው የፀጥታ ስጋት ዘላቂ መፍትሄ ለመስጠት እና በነዋሪዎች ላይ በተደጋጋሚ ጥቃት የሚያደርሱ ሃይሎችን ከህግ ፊት ለማቅረብ ተጨባጭ እርምጃዎች እንዲወስዱ አሳስቧል፡፡

በተጨማሪም በግጭቱ ምክንያት ከቤት ንብረታቸው የተፈናቀሉ ሰዎችን ወደ ቀደመ ቀያቸው መመለሱ እንደተጠበቀ ሁኖ ተፈናቃዮች ለከፋ የሰብዓዊ ቀውስ ከመጋለጣቸው በፊት በአፋጣኝ ወረዳውን ከአጎራባች አካባቢዎች የሚያገናኙ መንገዶች እንዲከፈቱና ፣ አስፈላጊው ሰብዓዊ እርዳታ መድረሱን እንዲያረጋግጡ ኪሚሽኑ በጥብቅ አሳስቧል፡፡

ሚኪያስ ፀጋዬ

ድርጊቱ የተፈፀመው በአዳማ ከተማ መስተዳድር ደንበላ ክፍለ ከተማ ኢሬቻ ቀበሌ ወንጂ ማዞሪ ተብሎ በሚጠራው አካባቢ ነው፡፡ ተጠርጣሪው ግለሰብ መስከረም 12 ከቀኑ 5 ሰዓት ገደማ በተመሳሳይ የመኪና ቁልፍ በመጠቀም 40 ሺ ብር ሲሰርቅ በቁጥጥር ስእ ውሏል።

በወቅቱ ግለሰቡ የሰረቀውን ገንዘብ እንደያዘ እጅ ከፍንጅ የተያዘ ሲሆን የክስ መዝገቡ እየተጣራ እንደሚገኝ ተገልጿል፡፡በሌላ መረጃ በከተማው አባ ገዳ ክ/ከተማ በተደረገው ድንገተኛ ፍተሻ ሁለት ሽጉጥ ከመሰል አስር ጥይቶች ጋር ሊያዝ ችሏል።

በተጨማሪም 52 ድምፅ የሌለው የጦር መሳሪያ (ቢላዋ) ይዘው ሲንቀሳቀሱ የነበሩ ግለሰቦች በቁጥጥር ስር ውለዋል።ግለሰቦቹ ከደበቡብ የሀገሪቱ ክፍል ወደ አፋር በመሄድ ላይ እንዳሉ እጅ ከፍንጅ ተይዘው በቁጥጥር ስር ውለው ጉዳያቸው በመጣራት ላይ እንደሚገኝ የከተማው አስተዳደር ፖሊስ መምሪያ ህዝብ ግንኙነትና ከፍተኛ ባለሙያ ረዳት ኢንስፔክተር ወርቅነሽ ገልሜቻ ለብስራት ሬዲዮ ተናግረዋል፡፡

ሳምራዊት ስዩም

የሄይቲ የአሜሪካ ልዩ መልዕክተኛ የሄይቲ ስደተኞች ወደሀገራቸዉ መመለስን በመቃወም ሥራቸዉን ለቀዋል፡፡ዩናይትድ ስቴትስ ስደተኞቹን የታጠቁ ወንበዴዎች ወደሚቆጣጠሩባት ሀገር ለመላክ መወሰኗን በመቃወም ዳንኤል ፎኦት የሥራ መልቀቂያ ደብዳቤያቸዉን አስገብተዋል፡፡

ባለፈው ሳምንት መጨረሻ አሜሪካ ስደተኞችን ከቴክሳስ ድንበር ከተማ መመለስ ጀምራለች፡፡ 13,000 የሚሆኑ ስደተኞች በ37 ዲግሪ ሴንቲ ግሬድ የሙቀት መጠን በጊዜያዊ ካምፕ በቴክሳስ ድንበር አቅራቢያ ተሰብስበዉ ነበር፡፡

የአካባቢው ባለሥልጣናት ምግብና በቂ የንፅህና መጠበቂያ ምርቶችን ሲያቀርቡላቸዉ ቆይተዋል፡፡በስደተኞች መጠለያ ጣቢያ ዉስጥ አብዛኛዎቹ የሄይቲ ስደተኞች ይሁኑ እንጂ ከኩባ ፣ ፔሩ ፣ ቬንዙዌላ እና ኒካራጓይ የመጡ ስደተኞች አሉበት፡፡

ከእሁድ አንስቶ አሜሪካ በሜክሲኮ ድንበር ላይ ከሚገኘው የቴክሳስ የስደተኞች መጠለያ ጣቢያ 1 ሺህ 401 ስደተኞችን ወደ ሄይቲ መልሳለች። የተባረሩ ስደተኞችን የጫኑ አዉሮፕላኖች ሄይቲ ዋና ከተማ ፓርት ኤ ፕሪንስ አውሮፕላን ማረፊያ ሲደርሱ ሁከት መነሳቱ ይታወሳል፡፡

በሚኪያስ ጸጋዬ

በማሊ ዋና ከተማ ባማኮ ከሩሲያ ጋር የጠበቀ ግንኙነት እንዲኖር ለመጠየቅ በተደረገው ሰልፍ ላይ በሺዎች የሚቆጠሩ ሰልፈኞች ተገኝተዋል፡፡ሰልፉ የተካሄደዉ በፈረንሳይ እና ማሊ መካከል ለቀናት ዲፕሎማሲያዊ ውዝግብ መካሄዱን ተከትሎ የማሊ ጊዜያዊ አስተዳደር ከሩሲያ ልዑክ ጋር እየተነጋገረ ይገኛል፡፡

አደባባይ የውጡት ሰልፈኞች የማሊን የሽግግር መንግስት እንደሚደግፉ አስታዉቀዋል፡፡ፈረንሣይ እና የቀጠናዉ ሀገራት በማሊ በየካቲት ወር ምርጫን እንዲከናዉን እና ከሩሲያ ጋር ሊኖር የሚችለው ትብብር እንዲቀር ግፊት እያደረጉ ይገኛል፡፡

ሰልፉ የተዘጋጀው የርወሎ በተሰኘ ንቅናቄ ሲሆን የፈረንሳይ ጦር በማሊ ዉስጥ መቆየቱን ይህዉ ንቅናቄ ይቃወማል፡፡እ.ኤ.አ ከ2013 አንስቶ በሰሜናዊ ማሊ የጂሃዲስቶችን ጥቃት ለመከላከል በሚል ፈረንሣይ እና ዓለም አቀፉ ማህበረሰብ ወታደራዊ ዘመቻ በማሊ ጀምሯል፡፡

ሆኖም ግን ይህ ዘመቻ ዘጠኝ አመታትን ቢያስቆጥርም ያለ ውጤት አንዳችም ደህንነት ሊያስገኝ አልቻለም በሚል ክፉኛ እየተተቸ ይገኛል፡፡

በስምኦን ደረጄ

በአማራ ክልል በህልውና እና ህግን ማስከበር ዘመቻዎች ከ700ሺህ በላይ ተፈናቃዮች መኖራቸውን የክልሉ አደጋ መከላከልና ምግብ ዋስት እና ልዩ ድጋፍ የሚሹ አካባቢዎች ማስተባባሪያ ኮሚሽን የህዝብ ግንኙነት ሃላፊ አቶ እያሱ መስፍን በተለይ ለብሰራት ሬዲዮ ተናግረዋል፡፡

እነዚህን ተፈናቃዮች ለመደገፍ እና ለማቋቋም ስራዎች እየተሰሩ ሲሆን ተግባሩ በተደራጀ ሁኔታ ይሆን ዘንድ ችግሩ ባላባቸው ቦታዎች ማለትም በደሴ፣በብናት እና በሰሜን ጎንደር ፈጣን የሆነ የአደጋ ምላሽ ስራ እና ሌሎችም ሴክተሮችን በማስተባበር ተፈናቃዮችን ወደ ነበሩበት ለመመለስ እየተሰራ ነው ብለዋል ፡፡

በተጨማሪም በክልሉ ከ2010 ጀምሮ በግጭት ምክንያት የተፈናቀሉ ዜጎች መኖራቸውን የተናገሩት ሃላፊው እነሱም ድጋፍ እንዲያገኙ የፌደራል እና የክልል መንግስታት የበኩላቸውን እያደረጉ መሆኑን አንስተዋል፡፡

ሆኖም ግን አሁን ላይ በአሸባሪው ህውሃት በተያዙት አካባቢዎች ላሉ ተፈናቃዮች የምግብ አቅርቦት ተደራሽ አለመሆን ችግር እንደሆነባቸው እና የክልሉ መንግስት ከተራድኦ ድርጅቶች ጋር በመሆን ምግብ ተደራሽ እንዲያደርግልን ሲሉ አቶ እያሱ ጥሪ አቅርበዋል፡፡

ቤተልሄም እሸቱ

የአልጄሪያ ፕሬዝዳንት ጽህፈት ቤት እንዳስታወቀዉ የሀገሪቱ የአየር ክልል ለሁሉም የሞሮኮ ሲቪል እና ወታደራዊ አውሮፕላኖች ዝግ ስለመሆኑ ይፋ አድርጓል፡፡ይህ እርምጃ ሊወሰድ የቻለዉ በሞሮኮ በኩል በጥላቻ የተሞላ እና ጸብ ጫሪ ቀስቃሽ ድርጊት በመቀጠሉ የተነሳ እንደሆን ጽህፈት ቤቱ ባወጣዉ መግለጫ አስታዉቋል፡፡

አልጄሪያ ከሞሮኮ ጋር ያላትን ዲፕሎማሲያዊ ግንኙነት በይፋ ማቋረጧ ይታወሳል፡፡የአየር ክልሏን ለሞሮኮ መዝጋቷን አልጀርስ ያስታወቀችዉ በፕሬዚዳንት አብዱልመጂድ ተቡቡኔ የሚመራዉ ከፍተኛ የፀጥታው ምክር ቤት ካካሄደዉ ስብሰባ በኃላ ነዉ፡፡

እርምጃው ሞሮኮን ከቱኒዚያ ፣ ከቱርክ እና ከግብፅ ጋር የሚያገናኟትን ሳምንታዊ 15 በረራዎች ላይ ብቻ ተጽዕኖ እንደሚያሳድር የሮያል ማሮክ አየር መንገድ አስታዉቋል፡፡በሮያል ማሮክ አየር መንገድ ላይ የሚሳድረዉ ተጽእኖ እዚህ ግባ የሚባል ባይሆንም በሜዲትራኒያ ላይ በረራዎች እንዲደረጉ ያስገድዳል፡፡

ሞሮኮ እስራኤል ሰራሽ በሆነዉ የስለላ ቴክኖሎጂ ፔጋሰስ አልጄሪያ ባለስልጣናትን ትሰልል ነበር እንዲሁም በአልጄሪያ ለተቀሰቀሰዉ ሰደድ እሳት እጇ አለበት በሚል ትከሰሳለች፡፡ሞሮኮ ክሱን ዉድቅ በማድረግ የአልጄሪያ መንግስት የሞሮኮ ተገንጣይ ሀይሎችን ያስታጥቅብኛል ስትል በተራዋ ትወነጅላለች፡፡

በስምኦን ደረጄ

በአማራ ክልል አንዳንድ ስፍራዎች በህውሃት የሽብር ቡድን የተፈፀሙ ጥቃቶችን በመሸሽ ደሴ ከተማ የሚገኙ ተፈናቃዮች ከ 3ሺ በላይ መሆናቸውን የከተማ አስተዳደር አስታውቋል ።

ከእነዚህ ተፈናቃይ ዜጎች መካከል አብዛኞቹ የሰብዓዊ ድጋፍ በሚገባው ልክ እየደረሳቸው እንዳልሆነ የከተማ አስተዳደሩ ምክትል ከንቲባ አቶ ሰኢድ የሱፍ ለብስራት ሬድዮ ተናግረዋል ።

እስከ አሁን ባለው ሂደት ዘጠና ሺህ ተፈናቃዮች ደግሞ ምንም አይነት ሰብዓዊ ድጋፍ እንዳልደረሰቸው ምክትል ከንቲባው ገልፀዋል ።

አለም አቀፍ የረድኤት ተቋማት አሁንም ቢሆን ጉዳዩን ትኩረት ነፍገውታል ያሉት አቶ ሰኢድ በቂ ባይሆን እንደ ዩኒሴፍ ያሉ ተቋማት ድጋፍ ለማድረግ እየተንቀሳቀሱ መሆናቸውን አስታወቀዋል ።

ምግብን ጨምሮ እንደ ፍራሽ ያሉ መሰረታዊ ነገሮች እጥረት አሳሳቢ መሆኑን ያነሱ ሲሆን ተፈናቃዮች የተሰጣቸውን ምግብ እንኳን አብስለው መመገብ የሚችሉባቸው ቁሶች እጥረት እንዳለ አንስተዋል ።

አብዛኞቹ ተፈናቃዮች በትምህርት ቤቶች ውስጥ በመሆናቸው መጪው የትምህርት ጊዜ በሚጀመርበት ጊዜ ተፈናቃዮቹን ማሳረፊያ ቦታ እጥረት ትልቁ ፈተና እንደሆነባቸው አቶ ሰኢድ የሱፍ ለጣቢያችን ተናግረዋል ።

ጊዜያዊ የስደተኞች መጠለያ በአፋጣኝ ተዘጋጅቶ ተፈናቃዮቹን ማዛወር ካልተቻለ የተማሪዎች ጉዳይ ትልቁ ራስ ምታት የሆነብን ጉዳይ ነው ሲሉ አስታውቀዋል ።

እነዚህን ችግሮች ለመቅረፍ የከተማይቱ ነዋሪዎች እና ሌሎች በጎ ፍቃደኞች ብቻ መሆናቸው የተነሳ ሲሆን ያለውን ችግር ዓለም አቀፍ የረድኤት ተቋማትን ጨምሮ ዓለም አቀፉ ማህበረሰብ ሊያውቀው ይገባል ሲሉ ለብስራት ሬድዮ ተናግረዋል ።

ናትናኤል ሀብታሙ

ግንቦት 3 ቀን 2013 ዓ.ም በይፋ ለደንበኞች የተዋወቀው ቴሌ-ብር ከቻይናው ሑዋዌ ኩባንያ በመተባበር ሥራ ላይ የዋለ ነው። ስራው ከስምንት ባንኮች ጋር በመተባበር እየተሰራበት ይገኛል።

ቴሌብር ባለፉት 127 አመታት የገነባንውን የቴሌኮም መሠረተ-ልማት በኢንፎርሜሽን የበለጸገ ማሕበረሰብ ከመገንባት ባለፈ ለፋይናንስ አገልግሎት ተደራሽ ያልሆነውን ማሕበረሰባችንን ተጠቃሚ ለማድረግ ታስቦ የተወለደ አገልግሎት ነው ሲሉ የኢትዮ ቴሌኮም ዋና ስራ አስፈፃሚ ወ/ት ፍሬሕይወት ታምሩ ተናግረዋል።

በ134 ቀናት 1.14 ቢሊዮን በቴሌቤብር አማካኝነት ገንዘብ ማዘዋወር ተችሏል።

በሌላ በኩል በዓለም ዙሪያ በቴሌኮም ዘርፉ ከተሰማሩ 778 ኩባንያዎች ፤ ኢትዮ ቴሌኮም 28ተኛ ደረጃ ላይ ይገኛል።

58 ሚሊዮን ደንበኞች ያሉት ኩባንያው ፤ እዚህ ደረጃ በደንበኞች ብዛት ስለመቀመጡ ብስራት ከኢትዮ ቴሌኮም ዋና ስራ አስፈፃሚ ወ/ሪት ፍሬህይወት ታምሩ ሰምቷል።

ከአፍሪካ ከMTN በመቀጠልም በሁለተኛው ደረጃ ላይ ይገኛል።

በአምስት አመት ጊዜ ውስጥ ከ40 እስከ 50 በመቶ የሚሆነውን የኢትዮጵያ የኢኮኖሚ ግብይት በቴሌብር አማካኝነት ለማድረግ ይቻል ዘንድ እቅድ ስለመያዙ ከኩባንያው ዋና ስራ አስፈፃሚ ወ/ሪት ፍሬህይወት ሰምተናል።

ሚኪያስ ፀጋዬ

1ኛ/ስምሪት ከተሰጠው የፀጥታ ሃይል ውጭ በከተማ ማንኛውንም አይነት የጦር መሳሪያ ይዞ መንቀሳቀስ አስፈላጊ ሁኖ ስላልተገኘ እንዲከለል ም/ቤቱ ወስኗል።

2ኛ/ለንግድ ስራ ከተፈቀደላቸው ቦታ ውጭ የእግረኛና የተሽከርካሪ መንገድ ዘግቶ መጠጥ ቤት ማስተናገድ ፣ኮበልስቶን መንገዶችን ዘግቶ ማንኛውንም ግብይት መፈፀም በጥብቅ የተከለከለ ነው።

3ኛ/ በከተማ በተናጥልም ሆነ በቡድን የተደራጀ የትኛውንም ህጋዊ ይሁን ህጋዊ ያልሆነ ቁማር ቤት ከፍቶ መጫዎት እና ማጫዎት ፈፅም የተከለከለ ነው።

4ኛ/ በከተማ በመንግስት ከተፈቀደለት ተቋም ውጭ ምንም አይነት ወታደራዊ ስልጠና መሰልጠንና ማሰልጠን ፈፅሞ የተከለከለ ነው።

5ኛ/ በመጠጥ ቤቶች አካባቢ ነዋሪዎችን የሚረብሽ ሁከትና ግርግር በመፍጠር ለሰላማዊ ነዋሪዎች ስጋት መሆን እና ተዛማጅ እንቅስቃሴዎችን ማድረግ የማይፈቀድ መሆኑ በመግለፅ ተላልፎ የሚገኝ አካል ላይ ህጋዊ እርምጃ መወሰድ እንደሚችል ፀጥታ ም/ቤቱ ወስኗል።

“የከተማችን ሰላም በጋራ እናስከብር!!”

ምንጭ፦ የባህርዳር ከተማ አስተዳደር ፀጥታ ምክር ቤት

የሱዳን ገዢ ሉዓላዊ ምክር ቤት ምክትል ፕሬዝዳንት የማክሰኞውን ያልተሳካ የመፈንቅለ መንግስት ሙከራ ተጠያቂዎች ፖለቲከኞች ናቸው ብለዋል።ሄሜቲ እየተባሉ የሚጠሩት ጄኔራል ዳጎሎ ከመፈንቅለ መንግስቱ ሙከራ ጀርባ ፖለቲከኞች አሉበት ምክንያቱም ዜጎችን ችላ ብለው በስልጣን ላይ እንዴት መቆየት እንዳለባቸው በመጨነቅ ላይ በመሆናቸው ነው ብለዋል።

ይህም በዜጎች መካከል አለመግባባት ፈጥሯል ሲሉ ተናግረዋል።የሱዳን ጠቅላይ ሚኒስትር ሃምዶክ በበኩላቸው ካልተሳካው መፈንቅለ መንግስት ጀርባ ከቀድሞ ስርዓት የተረፉ ሀይሎች ሴራ ማለታቸው ይታወሳል።

የውጪ ጉዳይ ሚኒስትሯ ማሪያ አል ሳዲቅ አል ማህዲ እንደተናገረችው በወታደራዊ ዝቅተኛ ደረጃ ያሉ የጦር መኮንኖች የመፈንቅለ መንግስት ሙከራውን የገቱ ሲሆን ይህም ለሀገሪቱ ሽግግር ያላቸውን ቁርጠኝነት ምልክት ነው ብለዋል።

በሚኪያስ ፀጋዬ