Author: Mintesinot Fikre

የአሜሪካ ፓለቲካ ሂደት እጅግ ከባድ እና ዉጣ ወረድ ያለዉ ነዉ። ፖለቲካዉ በሁለት ትላልቅ ፓርቲዎች የተወጠረና ፓርቲዉን የሚመሩት ግለሰቦች ከአገራዊ አመለካከት ለፓርቲአቸዉ አድልኦ ስላላቸዉ አንድ ፕሬዘዳንት የሚፈልገዉን ሰርቶ መቀመጫዉን ለመልቀቅ በጣም አስቸጋሪ ነዉ። ፕሬዘዳንት ኦባማ ከብዙ መሰናክሎች በኃላ የሚከተሉትን በታሪክ እንዲዘገቡ አድርገዋል።
1, የቀጥታ 65 ወራቶች የኢኮኖሚ እድገት
2, የግል ስራዎች እድገት ( longest period of private sector job creation in American history)
3, ስርአጥነት ከ10.1(2009) ወደ 5.4 መዉረድ(2015)
4, ፕሬዘዳንቱ ቢሮዉን ከተረከቡ ጀምሮ የካንፓኒዎች አክስዮን እድገቱ በሬኮርድ ነዉ።( The stock market continues to set new record high)
5, የመንግስት ብሔራዊ እዳ በ2/3 መዉረድ (ከ2009 በኃላ)
6, በፕሬዘዳንቱ ጃንጥላ ስር የመንግስት ወጪ ያደገዉ በ3.3% ብቻ ነዉ። ይህ ከቀድሞዉ ፕሬዘዳንት አይዘንሃወር በኃላ የመጀመሪያዉ ነዉ።
7, የቀረጥ ክፍያ ለ95% የአሜሪካ ከፋዮች አንሶአል። ይህ በ50 አመት ታሪክ ዉስጥ የመጀመሪያዉ ነዉ
8, ኦባማ ኬር(Affordable Care Act) በሚባለዉ አማካኝነት ወደ 10ሚሊዮን የሚሆኑ ግለሰቦች የህክምና ኢንሹራስ አላቸዉ
9, በ11 አመት ታሪክ ዉስጥ አሁን በቁጥራቸዉ የሚያንሱ ወታደሮች፣ አየር ሃይሎች፣ ማሪኖች በጦርነት ቦታ ላይ ይገኛሉ
10, በፕሬዘዳንቱ ዘመን: ከምንም ጊዜ በበለጠ ወረቀት የሌላቸዉ ዜጎች ተይዘዋል: ወደመጡበት እንዲመለሱም ተደርገዋል።
11, በምንም መልኩ ሊታሰብ የማይችለዉን ኒዉክለርን በተመለከተ ከኢራን ጋራ ሰላም እንዲወርድ አድርገዋል።

ቀዳማዊ ኃይለስላሴ በዲፕሎማሲያዊ ክህኖታቸዉ እና ከምእራብ አገሮች መሪዎች ጋራ በነበራቸዉ ቅርበት: የአሜሪካ ፕሬዘዳቶች በአፍሪካ መዲና በአገረ ኢትዮጰያ ብቅ ትልቅ ቢሉ ምንም አያስገርምም ነበር,
ይህ ሊሆን አልቻለም። እግዚአብሔር የፈቀደዉ አህጉሯን የመሰለ, በመምሰል ብቻ ሳይሆን በደሙ አፍሪካዊ በዜግነት አሜሪካዊ የሆነ ፕሬዘዳንት በምስራቅ አፍሪቃ በታላቋ የታሪክ ባለቤት ኢትዮጰያ እና በጎረቤት እና ለፕሬዘዳንቱ ከፊል ባለቤት በሆነቺዉ ኬንያ እንዲመጡ ሆነ።

በዚህ ታሪካዊ ጉብኝት ይህንን ለማለት ወደድን
ያባታቸዉን አገር እንደረገጡ ያስቀደሙት በግራ እህታቸዉን በቀኝ አያታቸዉን አስቀምጠዉ ከዘመዳዝማድ ጋራ እንጀራ መቁረስን የመረጡበት ምሽት አይረሴ ነበር
በስታዲዮሙ ያደረጉት ታሪካዊ ንግግራቸዉ እና ሌሎችም ክንዋኔዎች ቢኖሩም በጋዜጠኞች ስብሰባ ላይ ያገሩ ፕሬዘዳንት ኬንያታ ግብረሶዶማዉያንን በተመለከተ, “ይህ የናንተ ችግር ነዉ የአፍሪቃ አይደለም ብዙ ሊፈወሱ የሚፈለጉ ችግሮች አሉን ለዚህ ቦታ አንሰጠዉም” ያሉት, አገራቸዉን ብቻ ሳይሆን መላዉ አፍሪካን ያኮራ መልስ ነበርና እጅ ነስተናል

አዲስ አበባ ህዝቧ ብቻ ሳይሆን የነበረዉ በአፍሪካ ህብረት ስብሰባ ምክንያት አፍሪካዉያን ከነመሪዎቻቸዉ በመዲናችን ነበሩና ይህንን ጉብኝት ታሪካዊ እና ግለት እንዲኖረዉ አድርጎታል

በታላቁ ቤተመንግስት የእራት ግብዣ ላይ የሰዉን መጀመሪያነት በኢትዮጰያ ያረጋገጠችልንን ከእናት ሉሲ ጋራ መገናኘታቸዉ እና ትከሻቸዉን በስክስታ ወዝወዝ ያደረጉበት እና የቡናና የእጣኑ ምሽት ኢትዮጰያዊነትን አላብሶአቸዉ ነበር ።

በአፍሪካ ህብረት ታሪክ, ተቀማጭ የአሜሪካ መሪ ብቻ ሳይሆን, አለም ያላሰበችዉ የአሜሪካ ጥቁር ፕሬዘዳንት ከወድሞቻቸዉና ከእህቶቻቸዉ ጋራ በአባት ኔልሰን ማንዴላ ስም በተሰየመ አዳራሽ ጣሪያ ስር የታሪካዊ ንግግር ክስተት, መቼ ሊደገም ይችላል የሚለዉን ጥያቄ እንዳናስበዉ ያደርገናል።

በንግግራቸዉ ላይ ለሰዉ ልጅ እኩልነት, መብት እንዲሁም ክብር የሰጠው ትምህርታዊ መልእክት ለታሪክ የሚቀመጥ ነዉ። ከምንም በላይ ግን የስልጣን ዘመንን በተመለከተ ምነዉ ወድሞቼ ይህ አላስፈላጊ እና ሊገባኝ እማይችል ጉዳይ ነዉ, በተለይ ባለሃብት ሆናችሁ ማረፍን አለመፈለጋችሁ የሚገርም ነዉና እባካችሁ ስላጣንን ዉስን አድርጉት ያሉት ንግግር ከጆሮ እማይወጣ ነዉ።

ለአሜሪካ ቀረጥ ከፋዮች ወደ ስድስት ሚሊዮን ዶላር ያወጣዉ ይህ የሁለቱ ጎረቤታማቾች ጉብኝትን ሁለቱም አገሮች በሰላም ስለተወጡት ሊመሰገኑ ይገባል።

በመጨረሻ አንድ ነገር ልበል, በፈረንጆች አቆጣጠር በ1973 የኩባዉ መሪ “በኛ እና በአሜሪካ ሰላም ሊወርድ የሚችለዉ አሜሪካ ወደፊት ጥቁር ፕሬዘዳንት ሲኖራትና የካቶሊክ ፖፕ ከላቲን አሜሪካ ሲመረጥ ነዉ” ብለዉ ነበር። ይህንን ትንቢት ትላንት የአፍሪካዉ ህብረት ዋና ሃላፊ ዶክተር ዙማ ፕሬዘዳንት ኦባማን ሲያስተዋዉቁ አንስተዉት ነበር። የሚገርም ክስተት።

ቸር ይግጠመን!